„სამწუხაროა თავად ის ფაქტი, რომ ამ წერილის გაანალიზება გვიწევს. მასში მითიური საქართველოა აღწერილი. საუბარია არნახულ პროგრესზე თითქმის ყველა მიმართულებით. მე ვფიქრობ ეს წერილი არის ერთ–ერთი მიზეზი იმისა, თუ რატომ უნდა უთხრას უარი ამომრჩეველმა „ქართულ ოცნებას“ “. ბიძინა ივანიშვილის მიერ გამოქვეყნებული წერილის ძირითად აქცენტებსა და ხარვეზებზე „ნაციონალური მოძრაობის“ წევრმა გიორგი ტუღუშმა „პალიტრა ნიუსზე“, გადაცემა „360 გრადუსის“ ეთერში ისაუბრა.
„ეს წერილი არის არარეალისტური, შეიცავს არაერთ დამახინჯებულ ფაქტს. საუბარია ადამიანის უფლებების კუთხით არნახულ ნაბიჯებზე, ინვესტიციების შემოდინებაზე, სამუშაო ადგილების ზრდაზე, სოფლის მეურნეობის სექტორის აყვავებაზე. საუბარია ენერგოსექტორის არნახულ აყვავებაზე,როდესაც ამ სექტორში მთლიანად შემცირებულია ინვესტიციები.
ციფრებით მანიპულირება ახასიათებს „ქართულ ოცნებას“. რამდენიმე ექსპერტმა სახელიც გაითქვა ამ ციფრების წვალებით პირდაპირ ეთერში, მიდის ნამდვილი ჟონგლირება. თურმე წინა ხელისუფლებას ჰყავდა ექსპერტთა ჯგუფი, რომელიც შავზე თეთრს ამბობდა. ძალიან ცინიკურია როდესაც „2030“–ის ჩამომყალიბებელი საუბრობს ვინმეს მანიპულირებულ ექსპერტებზე. საბოლოოდ მივიღეთ ექსპერტთა ჯგუფი, რომელიც მარტივად ამბობდა, რომ დღე ღამეა და შავი თეთრია.
ადამიანების დაკვეთა არ არის 24 გვერდიანი წერილის კითხვა, მათ უნდათ შედეგი. ერთია რას ვაცხადებთ, და მეორეა საქმე. დღეს გვაქვს სიტუაცია, როდესაც ოკუპანტი გადმოდის და შენს მოქალაქეს კლავს. გიგა ოთხოზორია სასტიკად მოკლეს. ის, რომ რუსეთთან უნდა ვეძებოთ კეთილმეზობლური დამოკიდებულება და იგი არ არის ჩვენი მტერი, გასაგებია. ეს არ უნდა ხდებოდეს საქართველოს ინტერესების ხარჯზე, მცოცავი ოკუპაციის და ჩვენი მოქალაქეების მკვლელობის ხარჯზე. საქართველო ინერციით გაჰყვა წინა ხელსუფლების დაწყებულ კურსს.
„ნაციონალური მოძრაობა“ აღიარებს, რომ პენიტენციალურ სისტემაში არსებობდა ხარვეზები, მათ შორის რიგი სისტემური ხასიათის. თუმცა როდესაც თემა ხდება პოლიტიკური, ჭეშმარტების დადგენა რთულია. დღეს პატიმრების რაოდენობის კლება მისასალმებელია, მაგრამ კრიმინალი გაიზარდა გარეთ,“–განაცხადა გიორგი ტუღუშმა.
მანანა ღოღობერიძე
