„მარათონის დაწყება იწვევს მეტ დაძაბულობას როგორც პარტიებისთვის, ისე მედიისა და საზოგადოებისთვის. თუმცა პოზიტივი უნდა მოვძებნოთ, ფაქტობრივად გაორმაგებული დროა კამპანიის ჩასატარებლად“. ამის შესახებ პარლამენტის ვიცე-სპიკერმა მანანა კობახიძემ ტელეკომპანია „ GDS“-ზე, გადაცემა „2030“-ის ეთერში ისაუბრა.
„2012 წელთან შედარებით საკმაოდ ხანგრძლივი პერიოდია გამოყოფილი პარტიებისთვის. მათ აქვთ საკმარისზე მეტი დრო მოსამზადებლად, ამომრჩეველთან შესახვედრად.
არჩევნების მშვიდად ჩატარება არის ხელისუფლების ვალდებულება. კორცხელის ინციდენტის მსგავსი რამ აღარ უნდა განმეორდეს. ჩვენ გვაქვს ამის ამბიცია, პრეტენზია და რა თქმა უნდა პასუხისმგებლობა. ვისურვებ, რომ აგრესიის და სიძულვილის ენის გარეშე შევძლოთ კამპანიის ჩატარება“.
მანანა კობახიძემ ასევე ცენტრალური საარჩევნო კომისიის წევრთა რაოდენობის დადგენის წესი განმარტა.
„ცესკოში არის 12 წევრისგან შემდგარი კომისია. 7 პარტიების წარმომადეგენლი და 5 პროფესიული ნიშნით არჩეული წევრი. ისინი პრეზიდენტმა კონკურსის წესით შეარჩია და შემდეგ პარლამენტმა დაამტკიცა. თავის დროზე განისაზღვრა პარტიების რაოდენობა ყოფილიყო 7, თუმცა ყოველთვის შეიძლება 3%-იანი ბარიერი ბევრად მეტმა პარტიამ გადალახოს. ამიტომ წევრის ყოლის შესაძლებლობა ეძლევათ უკეთესი შედეგის მქონე პარტიებს“.
მანანა ღოღობერიძე
