ნოდარ, მოგვიყევით თქვენს შესახებ, როგორ გახდით ქართული უნივერსიტეტის სტუდენტური თვითმმართველობის პრეზიდენტი?
_ 2011 წელს ჩავაბარე საქართველოს საპატრიარქოს წმიდა ანდრია პირველწოდებულის სახელობის ქართულ უნივერსიტეტში ეკონომიკისა და ბიზნესის მართვის ფაკულტეტზე ეკონომიკის მიმართულებით. პირველივე წელს აქტიურად ჩავერთე საუნივერსიტეტო ღონისძიებებში, შემდეგ ერთი წლის განმავლობაში ვიყავი სტუდენტური თვითმმართველობის წევრი. მეორე კურსის ბოლოს ჩატარდა ახალი არჩევნები, სადაც ჯერ ჩემს ფაკულტეტზე ვიყარე კენჭი და ხმათა უმრავლესობით გავხდი პრეზიდენტობის კანდიდატი. შემდგომ სტუდენტების მიერ შერჩეული ოცკაციანი გუნდის მიერ ამირჩიეს სტუდენტური თვითმმართველობის პრეზიდენტად.
რამდენად საპასუხისმგებლო თანამდებობაა თქვენთვის პრეზიდენტობა და რა შეცვალა ამ მოვლენამ თქვენს ცხოვრებაში?
_ ზოგადად ყველა საქმეს პასუხისმგებლობით ვეკიდები და არც ესაა გამონაკლისი. ძალიან მინდა ადამიანების ნდობა გავამართლო და ყველაფერს ვაკეთებ ამისთვის. თავიდანვე ვაცნობიერებდი რომ რთულ და შრომატევად საქმეს ვიყავი შეჭიდებული, მაგრამ ჩემი მეგობრები და უნივერსიტეტის აკადემიური პერსონალი გამუდმებით მამხნევებდნენ, ვგრძნობდი მათ თანადგომას, რაც დღესაც მეტ ენთუზიაზმს მმატებს, რომ პირნათლად შევასრულო დაკისრებული მოვალეობები. ვთვლი, რომ წარმატებით გავართმევ თავს ამ საქმეს, რადგან მოტივირებული ვარ და მყავს კარგი გუნდი. რაც შეეხება ცვლილებებს, შემიძლია ვთქვა რომ, უფრო მეტად წინდახედული და დაფიქრებული გავხდი, რადგან მეტი პასუხისმგებლობა დამეკისრა, ვიდრე აქამდე, თავისუფალი დროის მხრივაც შეიცვალა მდგომარეობა, ახლა ერთმანეთს უნდა შევუთავსო სწავლა და უამრავი საქმე, ასევე სხვადასხვა პროექტი თუ კონფერენცია. თუმცა პიროვნულად ისევ ისეთი ვარ , ხიბლში არ ჩავვარდნილვარ, ყოველ შემთხვევაში აქამდე (იცინის).
რა პროექტები განხორციელდა თქვენი პრეზიდენტობის პერიოდში და როგორია ქართული უნივერსიტეტის სტუდენტური ცხოვრება?
_ დიდი ხანი არაა, რაც ეს თანამდებობა ჩავიბარე, თუმცა გამოვარჩევ რამდენიმე პროექტს, რაც უკვე მოვასწარით. პირველ რიგში, ეს იყო დაუვიწყარი ,,გამოსაშვები საღამოს” მოწყობა ბაკალავრიატის სტუდენტებისთვის. სულ ახლახანს ახალგაზრდულ მოძრაობა „დავითიანნთან“ ერთად ვიყავით ლორე-ტაშირის ექპედიციაზე. მოვილოცეთ ძველი ქართული ტაძრები: ახტალა და ქობაერი. ძალიან ამაღელვებელი იყო ქართული ხუროთმოძღვრების ძეგლებისა და წინაპართა საფლავების ხილვა. გულდასაწყვეტია, რომ ამ საფლავებს აღარავინ პატრონობს… რაც შეეხება სტუდენტურ ცხოვრებას, ადამიანები აქტიურად არიან ჩართული სხვადასხვა კლუბსა თუ ღონისძიებაში.
რა პრობლემებს ხედავთ და რომელ სფეროზე აპირებთ ყურადღების გამახვილებას?
_ ვცდილობთ გავითვალისწინოთ თითოეული სტუდენტის ინტერესთა სფერო, ასევე თვითონ მოდიან ხოლმე ინიციატივებით, შენიშვნებითა თუ რჩევებით. მათი ჩართულობის ხარისხი მაღალია, რაც, ვფიქრობ, ძალიან მნიშვნელოვანია, რადგან გვეხმარება პრობლემების დანახვასა და მათ გადაჭრაში, ასევე სიახლეების დანერგვაში. კონკრეტულ სფეროს ვერ გამოვყოფ, რადგან მიმაჩნია, რომ არსებულმა ჯგუფებმა (განათლებისა და მეცნიერების, სპორტის, ლაშქრობებისა და ექსკურსიების, კულტურისა და საზოგადოებასთან ურთიერთობის კლუბები) თანაბარად კარგად უნდა გაართვან თავი თავიანთ მოვალეობებს და ინტენსიურად დაგეგმონ და მოაწყონ ღონისძიება კონკრეტულად თავიანთ სფეროში.
როგორც ვიცი, საქმიანი ვიზიტით მოლდოვაში ბრძანდებოდით. თუ შეიძლება ამ ვიზიტის თაობაზე რომ გვესაუბროთ. რასთან დაკავშირებით იყო და რა ინფორმაციით დაბრუნდით?
_ 17 მაისს საქართველოს სპორტის და ახალგაზრდულ საქმეთა სამინისტროს მიერ ორგანიზებულ კონფერენციაში, რომელიც მიზნად ისახავდა სამხრეთ-კავკასიაში მიმდინარე კონფლიქტური რეგიონების პრობლემებში ახალგაზრდობის ჩართულობას, მათი პოზიციის დაფიქსირებასა და პრობლემათა გადაჭრის გზების ერთობლივ ძიებას, ქართული უნივერსიტეტის სახელით მივიღე მონაწილეობა. ასევე წარმოდგენილი იყო ჩვენი უნივერსიტეტის სტენდი, სადაც დაინტერესებულ პირებს შეეძლოთ მათთვის საინტერესო ინფორმაციის მიღება.
კონფერენციის მეორე ტურში შეარჩიეს 8 საუკეთესო ნაშრომის ავტორი, რომლებიც გაგვაგზავნეს მოლდოვაში, ქალაქ _ კიშინიოვში, რათა გავცნობოდით იქ არსებულ მსგავსი თემატიკის პრობლემას და მოგვესმინა ის გამოცდილება, რაც მოლდოვამ მიიღო დნესტრისპირეთის კონფლიქტის დროს. ვიზიტი ერთ კვირას გაგრძელდა. ყოველ დღე 10:00 საათიდან 19:00 საათამდე გვქონდა შეხვედრები სხვადასხვა სფეროს წარმომადგენლებთან, მათ შორის პოლიტიკოსებთან, რომელთაგანაც მოვისმინეთ მოლდოვა-დნესტრისპირეთის კონფლიქტის ისტორია. ჩვენ შევხვდით დაპირისპირებულთა ორივე მხარეს, რაც განსაკუთრებით საინტერესო იყო ჩემთვის. მათ შორის კონფლიქტი ისე მიმდინარეობს, რომ ომი არ ჰქონიათ. მრავალი საინტერესო ფაქტი გავიგე მათი ისტორიიდან და კიდევ უფრო დავინტერესდი მოვლენების ღრმა ანალიზით. თბილისში რომ დავბრუნდი მეტი ინფორმაციის მოძიების სურვილი გამიჩნდა. ზოგადად ძალიან ემოციური იყო ყველაფერი და პირადად მე დიდი გამოცდილება მივიღე. ასევე მეტი სტიმული მაქვს იმისთვის, რომ სხვა ახალ-ახალ პროექტებსა და კონფერენციებში მივიღო მონაწილეობა.
რა პროექტების განხორციელებას გეგმავთ ახალი სასწავლო წლიდან ?
_ სტუდენტური თვითმმართველობა დაყოფილია სამუშაო ჯგუფებად. თითოეულ მათგანს ჰყავს თავისი ხელმძღვანელი, რომელიც ცდილობს აქტიურად ჩართოს სტუდენტები და დაეხმაროს მათ თავისი ნიჭისა და უნარის გამოვლენაში. დაარსდა საზოგადოებასთან ურთიერთობის კლუბი, რომელის ერთ-ერთი ფუნქციაა სტუდენტების დაკავშ ირება ჩვენთან. ორიენტირებულები ვართ, რომ ინტელექტუალური, კულტურული და სპორტულ-გასართობი ღონისძიებები თანაბარი დოზით მივაწოდოთ დაინტერესებულ პირებს. სტუდენტებს ვურჩევდი, რომ აქტიურად ჩაერთონ სტუდენტურ ცხოვრებაში, გამოხატონ თავიანთი შენიშვნები თუ მოსაზრებები, შემოვიდნენ ინიციატივებით და მოკლედ არ მოგვცენ დასვენების საშუალება (იცინის). ჩვენ კი, ჩვენი მხრივ, მაქსიმალურად ვეცდებით დავაკმაყოფილოთ მათი სურვილები და საინტერესო ღონისძიებები თუ პროექტები შევთავაზოთ.
თქვენ როგორც სტუდენტური თვითმმართველობის თავმჯდომარე როგორ ფიქრობთ, როგორია სტუდენტური ცხოვრება საქართველოში, რას შეცვლიდით, რაზე არის გასამახვილებელი ყურადღება და თქვენ როგორ აპირებთ ამაში თქვენი წვლილი შეიტანოთ?
_ ვერ ვიტყვი, რომ საქართველოში სტუდენტური ცხოვრება პასიურია. ეს რომ ასე არაა, ამის დასტურად „სტუდენტური დღეების“ არსებობაც გამოგვადგება. ეს შესანიშნავი პროექტია, რომელშიც ყოველწლიურად სხვადასხვა უნივერსიტეტის უამრავი სტუდენტი ერთვება ერთი საერთო მიზნით. ( ასეთი, როგორც მოგეხსენებათ, წელს ნარკომანიის წინააღმდეგ ბრძოლა იყო.) მე ვფიქრობ, რომ სტუდენტობა – ეს მართლაც დიდი ძალაა, რომელსაც ძალიან სერიოზული მიზნების მიღწევაც შეუძლია. სტუდენტობა შეიძლება ჩართული იყოს სახელმწიფოებრივი დონის საქმეებშიც კი. მე, როგორც ქართული უნივერსიტეტის სტუდენტი და სტუდენტური თვითმმართველობის თავმჯდომარე, ვფიქრობ, რომ აუცილებელია გაკეთდეს მეტი ქართული საქმე. კონკრეტულ პროექტებზე საუბარი ჯერჯერობით არ მსურს, თუმცა მე და ჩემი გუნდი ყველანაირად შევეცდებით, რომ ჩვენი საქმიანობა იყოს არამარტო სტუდენტების კეთილდღეობისაკენ მიმართული, არამედ ქვეყნისა და ქართველი ხალხისათვის გამოსადეგი. სასურველია, რომ თითოეული უნივერსიტეტის თვითმმართველობის საქმიანობა გასცდეს თავისი უნივერსიტეტის ფარგლებს და ჩვენ ყველას გვქონდეს მჭიდრო კავშირი მასშტაბური პროექტების განსახორციელებლად.
დიდი მადლობა ნოდარ, საინტერესო საუბრისთვის. წარმატებას გისურვებთ თქვენ და თქვენს გუნდს.
_ მადლობა კეთილი სურვილებისთვის. ვეცდები, ჩემს გუნდთან ერთად გავამართლო იმ ადამიანთა იმედი, ვინც ჩვენდამი ნდობა და თანადგომა გამოხატა.