„არ გამოვრიცხავთ თანამშრომლობას ძალებთან,რომლებიც ეროვნულ პოზიციაზე დგანან.პატივს ვცემ „პატრიოტთა ალიანსს“ და მის ლიდერებს. ასევე არ გამოვრიცხავ ნინო ბურჯანაძის „დემოკრატიულ მოძრაობასთან“ თანამშრომლობას. ჩვენ დიდი ხნის ერთად მუშაობა გვაკავშირებს“. ამის შესახებ პარტია „მრეწველების“ ლიდერმა ზურაბ ტყემალაძემ ტელეკომპანია „GDS“-ზე, გადაცემა „2030“-ის ეთერში ისაუბრა.
„პირადი სიმპატიები სხვაა და აუცილებელია ანალიზი, თუ რას მოგვცემს ამა თუ იმ ბლოკში გაერთიანება. არ გვინდა შევქმნათ ისეთი კონგლომერატი, სადაც თავიდანვე ვიცით, რომ ვერ ჩავეტევით. ჩვენ ვართ პრო-ქართული ძალა, მაგრამ ასე დაყოფა არ მიმაჩნია სწორად. პოლიტიკური ძალა არის მემარჯვენე ან მემარცხენე იდეოლოგიის, რა შუაშია ჩრდილოეთი და დასავლეთი. ჩვენ პოზიციას არ ვიცვლით. იმ პოლიტიკურ ძალებთან ერთად, რომლებმაც თავის დროზე ბლოკი შადგინეს, არჩევნებში მონაწილეობას არ მივიღებთ. ეს არის კოალიცია „ქართული ოცნების“ შემადგენელი 5 პარტია. „პატრიოტთა ალიანსმა“ უკვე შექმნა ბლოკი და მათთან ურთიერთობაც გამოირიცხა.
ჩვენი პარტული პროგრამა და წინასაარჩევნო კამპანია უცვლელია. ჩვენ ისევ ვფიქრობთ,რომ ქვეყანაში უნდა იყოს ძლიერი ეკონომიკა და ამან უნდა გააერთიანოს საქართველოს ტერიტორიული მთლიანობა.ჩვენ უნდა გადავარჩინოთ მრეწველობა და მრეწველობა გადაარჩენს საქართველოს“.
ზურაბ ტყემალაძემ ასევე უფასო სარეკლამო დროის შესახებ მიღებულ კანონპროექტზე ისაუბრა.
„არ არის კონსტიტუციური, როდესაც ბლოკიდან გასული პარტიებიდან სარეკლამო დრო მხოლოდ პირველ ნომერს მიეცემა და დანარჩენს არა. შეუძლებელია დადგენა თუ ვინ რამდენი წვლილი შეიტანა ბლოკის გამარჯვებაში. „მრეწველები“ კვალიფიციური სუბიექტები ვართ 1999 წლიდან მოყოლებული. ჩვენ ყოველთვის ვსარგებლობდით უფასო საეთერო დროით. ახლა იძულებული ვართ კონსტიტუციის ფარგლებში მოვექცეთ. პრეზიდენტმა რომ ვეტო დაადოს, უნდა არსებობდეს სამართლებრივი საფუძველი. უნდა შევეგუოთ ამ რეალობას.“
მანანა ღოღობერიძე
