1-5 ივლისს თბილისი ეუთო-ს საპარლამენტო ასამბლეის ყოველწლიურ შეკრებას უმასპინძლებს. პარლამენტის პრესსამსახური ინფორმაციით, სესიის თემა იქნება – ”25-წლიანი საპარლამენტო თანამშრომლობა: ნდობის შენება დიალოგით“.
მათივე ინფორმაციით, ევროპის უსაფრთხოებისა და თანამშრომლობის ორგანიზაციის (ეუთო) საპარლამენტო ფორუმს მისი წევრი 57 ქვეყნიდან 700-ზე მეტი სტუმარი დაესწრება.
აღსანიშნავია, რომ ღონისძიებაზე, რომელსაც ეუთო-ს გენერალური მდივანი, გერმანიის ფედერაციული რესპუბლიკის საგარეო საქმეთა მინისტრი, აშშ-ის კონგრესის დელეგაცია, სხვადასხვა ქვეყნის პარლამენტის თავმჯდომარეები, ვიცე-სპიკერები და კანონმდებლები დაესწრებიან, ეუთო-ს ქვეყნების სივრცეში არსებულ უსაფრთხოების საკითხებს, ეკონომიკურ თანამშრომლობას, ადამიანის უფლებების სფეროში არსებულ გამოწვევებს და მიგრაციის გლობალურ პრობლემებს განიხილავენ.
საპარლამენტო ასამბლეის ყოველწლიური შეკრება ყოვლისმომცველი და ისტორიული „თბილისის დეკლარაციის“ მიღებით და ასამბლეის პრეზიდენტის არჩევით დასრულდება.
”აღნიშნული ყოველწლიური სესია ორ მნიშვნელოვან თარიღს ემთხვევა – 2016 წელს ეუთო-ს საპარლამენტო ასამბლეა 25 წლის იუბილეს აღნიშნავს, საქართველო კი დამოუკიდებლობის აღდგენიდან 25 წლისთავს ზეიმობს.
აღნიშნული ფორმატის შეკრებას საქართველო პირველად უმასპინძლებს, რაც პოლიტიკურ რუკაზე ქვეყნის ავტორიტეტსა და შესაძლებლობებს მნიშვნელოვნად გააძლიერებს. საპარლამენტო ფორუმი საქართველოს მისთვის მნიშვნელოვანი საკითხების კიდევ უფრო წინ წამოწევის შესაძლებლობას მისცემს. ღონისძიების მნიშვნელობიდან გამომდინარე, საორგანიზაციო და მოსამზადებელი სამუშაოები ინტენსიურად მიმდინარეობს. საერთაშორისო საპარლამენტო ფორუმის დაწყებამდე ორი კვირაა დარჩენილი”, – აცხადებენ პარლამენტში.
ევროპის უსაფრთხოებისა და თანამშრომლობის ორგანიზაციის საპარლამენტო ასამბლეის ყოველწლიური შეკრება 1-5 ივლისს საგამოფენო ცენტრ „ექსპო ჯორჯიას“ ტერიტორიაზე გაიმართება.
