„დარბაზში უამრავი პოლიციელი დგას თუმცა არც ერთი გამოჩენილა და არ ჩარეულა ამ საქმეში.არ გააკეთეს არაფერი,რომ ეს ინციდენტი თავიდან აეცილებინათ. მგზავრები აშველებდნენ ამ ჩხუბს“. თბილისის აეროპორტში ტელეკომპანია „რუსთავი-2“-ის გადამღები ჯგუფის შეურაცხყოფის ფაქტზე ტელეკომპანიის გენერალური დირექტორის მოადგილემ , ჟურნალისტმა ზაალ უდუმაშვილმა „ტვ-პირველზე“, გადაცემა „ინგა გრიგოლიას დღის ამბებში“ ისაუბრა.
„შინაგან საქმეთა სამინისტრომ კადრების მხოლოდ ერთი ნაწილი გაავრცელა. ის, რომელიც მას აწყობდა. ამ ფაქტს წინ უძღოდა უცნობი პირის მისვლა ჟურნალისტთან მაშინ, როდესაც ის ინტერვიუს იღებდა. უცნობმა პირმა შეურაცხყოფა მიაყენა ჟურნალისტს და შემდეგ შორიდან აგრძელებს ლანძღვა-გინებას. ამ დროს ჟურნალისტური საქმიანობა დასრულებული არ იყო.
ვითხოვთ, რომ გამოძიებას შეეცვალოს კვალიფიკაცია და წარიმართოს ჟურნალისტური საქმიანობის ხელის შეშლის მუხლით. სასწრაფოდ დაიწყეს გამოძიება ცემის მუხლით, ამ შემთხვევაში მაქსიმუმ ჯარიმით გადარჩება ის ადამიანი, ვინც ეს ჩაიდინა. ტესტავენ რამდენად გაუვათ ჟურნალისტების მიმართ აგრესია,რომ გააგრძელონ არჩევნების წინ. დარწმუნებული ვარ, რომ აგრესია ჟურნალისტების მიმართ კიდევ უფრო მძაფრი გახდება.
ეს იყო შეგნებულად დაგეგმილი პროვოკაცია. თუ მკაცრად არ მოვითხოვეთ ადეკვატური პასუხი, მივიღებთ, რომ ყველა გადამღები ჯგუფი გახდება აგრესიის მსხვერპლი. მედიის ყველა წარმომადგენელმა უნდა მოვითხოვოთ რეაგირება, დამნაშავეების დასჯა,“ – განაცხადა ზაალ უდუმაშვილმა.
მანანა ღოღობერიძე
