„მე არ მჯერა გამოძიების ვერსიის. იმ ტიპის ადამიანები, როგორიც იყო ეროსი კიწმარიშვილი, თავს არ იკლავენ 300 ათასი ამერიკული დოლარი დავალიანების გამო“. პროკურატურის მმიერ ეროსი კიწმარიშვილის საქმის დახურვის შესახებ „გაერთიანებული დემოკრატიული მოძრაობის“ ლიდერმა ნინო ბურჯანაძემ „ტვ-პირველზე“, გადაცემა „ინგა გრიგოლიას დღის ამბებში“ ისაუბრა.
„მე ვიცი როგორი სერიოზული გეგმები ჰქონდა ეროსი კიწმარიშვილს. ის იყო იმედებით სავსე, ჰქონდა საინტერესო პროექტები. გეგმები ჰქონდა ნაბიჯ-ნაბიჯ გაწერილი. ამ ხასიათის ადამიანები თვითმკვლელობით სიცოცხლეს არ ასრულებენ.
განზრახ მკვლელობაზე და პროკურატურის მხრიდან განზრახ გაყალბებაზე ვერ ვისაუბრებ, თუმცა პროკურატურა თავისი არასაკმარისი კომპეტენციის გამო შესაძლებელია არასწორ გზაზე გასულიყო. საქმის დახურვას აქვს ერთი პლიუსი, პროკურატურა ვალდებულია გაასაჯაროვოს გამოძიების დეტალები. თუ ვინმეს დამატებითი კითხვები და არგუმენტები გააჩნია, შეიძლება ამ დეტალებით იმსჯელონ“.
ნინო ბურჯანაძემ პროკურატურის მიერ აქამდე გამოუძიებელ სხვა საქმეებზეც ისაუბრა.
„პროკურატურამ არაერთხელ აჩვენა,რომ ის არ არის კვალიფიციური. პროკურატურის საყოველთაოდ ცნობილი არაპროფესიონალიზმი ნამდვილად იძლევა კითხვის დასმის შესაძლებლობას. ვერ შეძლო გამოეძიებინა სხვა მნიშვნელოვანი საქმეებიც.
პროკურატურის არაპროფესიონალიზმის მაჩვენებელია ის, რომ ვანო მერაბიშვილთან დაკავშირებით ახლა დაიწყო გამოძიება, რომელსაც საზოგადოება დიდი ხანია ითხოვდა. კითხვები ჟვანიას გარდაცვალებასთან დაკავშირებითაც დარჩა. მიუხედავად იმისა, რომ ეს საქმეც დაიხურა. პროკურატურა გამუდმებით აცხადებდა, რომ გამოძიება დასრულებულია, საზოგადოება გაიგებს ახალ ამბებს, და მერე ისევ ყველაფერი უცვლელი რჩებოდა. ესეც არის არგუმენტი, რომელიც კითხვის ნიშნებს აჩენს. სამწუხაროდ ყველა ხელისუფლების პირობებში იწყება დაპირებები, რომ გამოძიებები იქნება ჩატარებული, თუმცა ყველაფერი ისევ ისე რჩება“.
მანანა ღოღობერიძე
