„მოსახლეობა უნდა ენდოს არა კვლევას, არამედ იმ ხედვებს, რომელიც თითოეულ პარტიას გააჩნია. გამოქვეყნებული კვლევები არის უბრალოდ მოცემულ მომენტში არსებული განწყობების ინდიკატორი. პარტია არჩევნებს იგებს კონკრეტული ხედვით და არა ციფრებით“. გერმანულ-ამერიკული ორგანიზაცია „GFK“-ის მიერ ჩატარებულ კვლევებზე „ნაციონალური მოძრაობის“ წევრმა სერგი კაპანაძემ „ტვ-პირველზე“,გადაცემა „ვახო სანაიას დღის ამბებში ისაუბრა“.
ჩვენ ყველა კვლევას სერიოზულად ვეკიდებით და არ გვაქვს ამოცანა,რომ ვიღაცა გავაკრიტიკოთ. მაგრამ იმისათვის,რომ კვლევა იყოს სანდო,უნდა ვიცოდეთ ვინ ჩაატარა, რა მეთოდოლოგია იქნა გამოყენებული. სტანდარტს აკმაყოფილებს მხოლოდ რამდენიმე კვლევა, მათ შორის „NDI“და „GFK“.
არასერიოზულია საუბარი იმაზე, რომ ამ ორგანიზაციების გაერთაინებით რაღაც შეთქმულება არის „ქართული ოცნების“ წინააღმდეგ. ესენი არიან საერთაშორისოდ აღიარებული ორგანიზაციები, მათი რეზულტატები არის სანდო და მეთოდოლოგია გამჭვირვალე. სანდოობის ინდიკატორი ჩვენთვის ის არის, რომ საერთაშორისო ორგანიზაციები ერთნაირ შედეგებს დებენ. თუმცა საბოლოოდ ეს არაფერს არ ნიშნავს. მოსახლეობამ ხმა უნდა მისცეს არა კვლევების შედეგების, არამედ იმის მიხედვით, თუ ვინ რას სთავაზობს. ჩვენ ეკონომიკურ სამოქმედო გეგმაში კონკრეტულ კითხვებზე გვაქვს პასუხი გაცემული.
„ნაციონალურ მოძრაობას“ არანაირი შეხება არ აქვს ამ კვლევასთან. „ქართული ოცნება“ ამას აღიქვამს კვლევების ომად, რაც არაადეკვატურია. მათ საწინააღმდეგო შიდა კვლევა გამოაქვეყნეს. ამ ფაქტზე ქართული ანდაზა მახსენდება, მელამ მოწმედ თავისი კუდი მოიყვანაო. ჩვენ შიდა კვლევებს პარტიულ სტრატეგიის განსაზღვრისთვის ვატარებთ და არა გამოსაქვეყნებლად. ერთის მხრივ გვაქვს სამი მსოფლიოში აღიარებული ორგანიზაციის კვლევა მსგავსი შედეგებით, და მეორე მხრივ ბიგვავას შიდა კვლევა. ნათელია, რომელი უფრო მეტად სანდოა,“ – განაცხადა სერგი კაპანაძემ.
მანანა ღოღობერიძე
