„ხელისუფლება ამბობს,რომ აქვს პოლიტიკური ნება ამ საქმის გამოძიების. ის გამოძიება, რაც დღეს დაიწყო, სულ მცირე 2013 წლის დასაწყისში უნდა დაწყებულიყო. ახალი ხელისუფლების მხრიდან ამ საქმესთან დაკავშირებით დიდი დრო გაიფლანგა. გამოძიება ცხელ კვალზე უფრო კარგია“. სულხან მოლაშვილის წამების საქმის დეტალებზე უფლებადამცველი ნანა კაკაბაძე ტელეკომპანია „GDS“-ზე, გადაცემა „2030“-ის ეთერში საუბრობს.
„პროკურატურას უნდა ჰქონდეს ის ინფორმაცია, რაც მე მაქვს. მე გამომძიებელთან ვისაუბრებ თუ რას ყვებოდა სულხანი, ვინ იყო მის საკანში, რა მდგომარეობაში იყო, როგორ იყო ნაწამები. მნიშვნელოვანია, რომ ჩემთან იყო მოსული ექიმი, რომელმაც თქვა, რომ მას შემდეგ რაც თქვენ ეს ინფორმაცია გაასაჯაროვეთ, დაიწყო გამოძიება თუმცა უნდათ ჯოხი ჩვენზე გადმოტეხონ, მე მიპირებენ განთავისუფლებასო. გამოძიებისთვის მნიშვნელოვანია ამ ექიმის დაკითხვაც.
გამოძიების სისუსტეა, რომ დაკითხული არც მე ვიყავი, რომელიც პირველი თვითმხილველი გავხდი სულხან მოლაშვილის წამების ამსახველი მდგომარეობის. დაკითხული არ იყო თავად სულხან მოლაშვილიც. შესაბამისად, გამოძიებას ჰქონდა ბევრი კითხვის ნიშანი. სულხან მოლაშვილმა მითხრა, რომ იქ იყო ჩემი მეგობრები, ბოკერია და ადეიშვილი. უამრავ ინტერვიუში ის პირდაპირ ასახელებს ამ გვარებს თუმცა არანაირი რეაგირება არ მოჰყოლია.
ჩვენი მოთხოვნაა, რომ დაისაჯოს ყველა ის პირი, რომელმაც უშუალოდ მიიღო მონაწილეობა სულხან მოლაშვილის წამებაში, ვინც დაუკვეთა და ვინც შექმნა სისტემა. ეს არის პეტიცია, რომელიც მხოლოდ ხელისუფლებისთვის არის გამიზნული. ეს არის საზოგადოების დაკვეთა, რომელიც დღემდე არ შესრულებულა. რეჟიმის მსხვერპლების მიმართ სამართლიანობა არ აღდგენილა,“ – განაცხადა ნანა კაკაბაძემ.
მანანა ღოღობერიძე
