თბილისის საკრებულოს თავმჯდომარემ და დედაქალაქის მერმა დედაენის ბაღში ცნობილი ქართველოლოგის მარი ფელისიტე ბროსეს ბიუსტი გახსნეს.
გიორგი ალიბეგაშვილმა და დავით ნარმანიამ შეკრებილ საზოგადოებას სიტყვით მიმართეს, მარი ბროსეს მოღვაწეობის მნიშვნელობაზე ისაუბრეს და ქართული კულტურისა და ისტორიის პოპულარიზაციის საქმეში მის მიერ გაწეულ ღვაწლს გაუსვეს ხაზი.
მარი ბროსეს ბიუსტი წლების მანძილზე თბილისის ერთ-ერთ სკვერში იყო განთავსებული, საიდანაც 2004 წელს ქანდაკება მოიპარეს.
ბიუსტის აღდგენა ცნობილი ქართველი მოქანდაკის ჯუნა მიქატაძის მიერ შექმნილი ყალიბის გამოყენებით მოხდა.
მარი ფელისიტე ბროსეს ნაშრომებმა საფუძველი ჩაუყარა მეცნიერულ ქართველოლოგიას ევროპაში. მეცნიერმა შეისწავლა პარიზში დაცული ქართული ხელნაწერები, გამოაქვეყნა რამდენიმე ქართველოლოგიური ნაშრომი და ქართული ენის გრამატიკის სახელმძღვანელოები.
დიდი წვლილი შეიტანა ბროსემ ქართული ენისა და ლიტერატურის შესწავლის საქმეში.
ბიუსტის გახსნას თბილისის საკრებულოს სახელდებისა და სიმბოლიკის კომისიის თავმჯდომარე ლია ჯახველაძე, ხელნაწერთა ეროვნული ცენტრის დირექტორი ზაზა აბაშიძე, საქართველოს მეცნიერებათა ეროვნული აკადემიის ვიცე-პრეზიდენტი როინ მეტრეველი, არქიტექტორი გიგა ბათიაშვილი, ენათმეცნიერები, ისტორიკოსები და მარი ბროსეს შთამომავლები ესწრებოდნენ.