პარლამენტის თავმჯდომარე დავით უსუფაშვილი მიიჩნევს, რომ ლევან იზორიას თავდაცვის მინისტრად დანიშვნით სისტემურად არასწორი ნაბიჯია გადადგმული. ამის შესახებ პარლამენტის თავმჯდომარე დავით უსუფაშვილმა საზოგადოებრივი მაუწყებლის გადაცემაში ”მთავარი” განაცხადა.
” მმართველი გუნდისთვის, პრემიერისთვის ეს თემა, რომ თავდაცვის მინისტრი აღარ იქნებოდა თინა ხიდაშელი, დიდი ხანია ცნობილი იყო და მათივე სურვილიც იყო, რომ ეს ასე მომხდარიყო, ამიტომ შეიძლებოდა უკეთ მომზადება ამ საქმისთვის. მაგრამ მე უფრო ღრმად არ ჩავალ რამოდენიმე მიზეზის გამო, ზოგ მიზეზს უბრალოდ არც კი დავასახელებ, მაგრამ არის კიდევ სხვა მიზეზები. მე პარლამენტის თავმჯდომარე ვარ, უშიშროების საბჭოს წევრი ვარ მეც და ახლად დანიშნული თავდაცვის მინისტრიც. ჩვენ ერთად მოგვიწევს ძალიან სერიოზულ საქმეებზე მსჯელობა. ცხადია, ქვეყნის და სახელმწიფოს ინტერესებიდან გამომდინარე, რა თქმა უნდა მექნება ის ურთიერთობა, რაც უნდა მქონდეს. თავად ლევან იზორიას ვიცნობ ძალიან დიდი ხანია, უნივერსიტეტის პირველი წლებიდან. მას ძალიან მნიშვნელოვანი მიმართულებებით აქვს სერიოზული კვალიფიკაცია, მაგრამ თავდაცვის უწყების და ჯარის სპეციფიკიდან გამომდინარე მე მგონია, რომ ეს სისტემურად არასწორად დანახული მომავალია და არასწორი ნაბიჯია.
მაგრამ, მე ვისურვებ, რომ ამ ჩემი აზრით არასწორმა ნაბიჯმა არასწორი პოლიტიკა არ გამოიწვიოს ამ საფეროში და ამისთვის ყველამ უნდა იზრუნოს-პრემიერმაც, მინისტრმაც, მეც ჩემი მხრიდან რაც შემეძლება, იმიტომ, რომ ჯარი და თავდაცვის უწყება ეს არის ის სფერო, სადაც ყველას ინტერესშია ნაბიჯების სწორად გადადგმა. ამიტომ, მე ოპონენტი ვარ ამ შემთხვევაში ”ქართული ოცნების”, ოპონენეტი ვარ პრემიერის ამ არჩევნებზე, მაგრამ არ მიხარია ის, რასაც ვამბობ. მე გამიხარდებოდა სხვა რამ რომ შემეძლოს მეთქვა”, – განაცხადა დავით უსუფაშვილმა.
პარლამენტის თავმჯდომარემ ისაუბრა შერიგებისა და სამოქალაქო თანასწორობის საკითხებში ახალ სახელმწიფო მინისტრ ქეთევნ ციხელაშვილზე.
”მგონია, რომ ციხელაშვილი ყველა თვალსაზრისით არის ის კადრი, რომელიც ამ საქმეს გაუძღვება არანაკლებ და შესაძლოა უკეთესად, ვიდრე პაატა ზაქარეიშვილი უძღვებოდა”, – განაცხადა უსუფაშვილმა.
