სპორტისა და ახალგაზრდობის საქმეთა მინისტრი ტარიელ ხეჩიკაშვილი მოადგილე შალვა გოგოლაძესთან ერთად, რიო დე ჟანეიროს ოლიმპიურ სოფელში მდებარე საქართველოს დელეგაციის ოფისში ოლიმპიური კომიტეტის პრეზიდენტ ლერი ხაბელოვს და დელეგაციის წევრებს შეხვდა.
შეხვედრას ოლიმპიური კომიტეტის პირველი ვიცე-პრეზიდენტი ელგუჯა ბერიშვილი, გენერალური მდივანი ემზარ ზენაიშვილი, ვიცე-პრეზიდენტი მამუკა ხაბარელი, სპორტის და ახალგაზრდობის საქმეთა სამინისტროს სპორტის დეპარტამენტის უფროსი ირაკლი დოლაბერიძე, გუნდის ექიმიზურაბ კახაბრიშვილი, რამდენიმე სახეობის მწვრთნელები და ადმინისტრაციის წევრები ესწრებოდნენ. შეხვედრაზე იმყოფებოდა საქართველოს ელჩი ბრაზილიაში ოთარ ბერძენიშვილი.
სამუშაო შეხვედრაზე საუბარი იყო ოლიმპიური თამაშების პირველ საშეჯიბრო დღეებში ქართველი სპორტსმენების გამოსვლის შესახებ, ასევე ზოგადად იმ მდგომარეობის შესახებ, რაც ბრაზილიაში ოლიმპიური თამაშების სტარტზეა შექმნილი, ყურადღება გამახვილდა სამომავლო გეგმებსა და მოახლოებულ ასპარეზობებზე.
„დღეს ვესტუმრეთ ჩვენს ოლიმპიელებს და ეროვნული ოლიმპიური კომიტეტის ხელმძღვანელობასთან ერთად დავათვალიერეთ ოლიმპიური სოფელი, მოვინახულეთ დელეგაციის წევრები, მწვრთნელები და სპორტსმენები.
ოლიმპიადის სტარტს, რა თქმა უნდა თან ახლავს დიდია ემოციები და ნერვიულობა, თუმცა მთავარი ისაა, რომ ოლიმპიურ გუნდში საბრძოლო განწყობაა, გულშემატკივარს წარმატების დიდი მოლოდინი აქვს და ვფიქრობ, რომ დღეიდან უკვე შევძლებთ მედლების ათვლას, რის იმედსაც ჩვენი ძიუდოისტები ნამდვილად გვაძლევენ.
მთლიანობაში, შემიძლია ვთქვა, რომ ჩვენი ოლიმპიელები ერთ გუნდად არიან შეკრულნი. ის 4-წლიანი შრომა რაც სპორტსმენებმა მწვრთნელებთან და ზოგადად ფედერაციებთან ერთად გასწიეს, შედეგს ნამდვილად გამოიღებს და რიო დე ჟანეიროს ოლიმპიადა განსაკუთრებით წარმატებული იქნება ჩვენთვის. მჯერა, რომ საქართველოს ოლიმპიური გუნდი სათანადო ადგილს დაიკავებს და ჩვენი ქვეყნის ჰიმნი ბრაზილიაში არაერთგზის აჟღერდება” – განაცხადა ტარიელ ხეჩიკაშვილმა.
