სომხეთის საგარეო საქმეთა მინისტრმა ქართველ კოლეგას საქართველოს სუვერენიტეტისა და ტერიტორიული მთლიანობისადმი სომხეთის ურყევი პოზიცია დაუდასტურა
საქართველოს საგარეო საქმეთა მინისტრი მიხეილ ჯანელიძე სომეხ კოლეგას ედვარდ ნალბანდიას შეხვდა. შეხვედრა ბრატისლავაში, ევროკავშირის და აღმოსავლეთ პარტნიორობის ქვეყნების საგარეო საქმეთა მინისტრების არაფორმალური მინისტერიალის ფარგლებში 2016 წლის 3 სექტემბერს გაიმართა.
მხარეებმა კვლავ დაადასტურეს ორი ქვეყნის კეთილმეზობლური ურთიერთობა და სხვადასხვა სფეროში სამომავლო თანამშრომლობის გაღრმავების სურვილი. ამ კონტექსტში მინისტრებმა მიმოიხილეს სომხეთის რესპუბლიკაში საქართველოს პრემიერ-მინისტრის ვიზიტის მოსამზადებელი საკითხები, ხაზი გაესვა ორი ქვეყნის ურთიერთობაში მაღალი დონის ვიზიტების ურთიერთგაცვლის მნიშვნელობას.
სომხეთის საგარეო საქმეთა მინისტრმა ქართველ კოლეგას კიდევ ერთხელ დაუდასტურა საქართველოს სუვერენიტეტისა და ტერიტორიული მთლიანობის მიმართ სომხეთის ურყევი მხარდაჭერა. ამასთან, საქართველოში სომხეთის რესპუბლიკის საელჩომ გუშინ გაავრცელა სომხეთის სახელმწიფოს პოზიცია მედიაში გასულ ინფორმაციასთან დაკავშირებით და აღნიშნა, რომ სიმართლეს არ შეესაბამება ცნობა სომხეთის რესპუბლიკის პრეზიდენტსა და აფხაზეთის სეპარატისტული რეჟიმის წარმომადგენლებს შორის თითქოსდა გამართული შეხვედრის, და მითუმეტეს საუბრის ან მოლაპარაკების შესახებ.
ინფორმაციისთვის, გუშინ სოციალურ ქსელში გავრცელდა ინფორმაცია, რომ ოკუპირებული აფხაზეთის დელეგაცია არაღიარებული მთიანი ყარაბაღის რესპუბლიკაში საზეიმო ღონისძიებას სომხეთის პრეზიდენტ სერჟ სარგსიანთან ერთად დაესწრო.
