„მნიშვნელოვანი იქნება თანამშრომლობა პარლამენტს გარეთ დარჩენილ ძალებს შორის. ამ არჩევნებმა გვიჩვენა,რომ ცალ–ცალკე ბრძოლა ზოგჯერ გვასუსტებს და ჯობს თანამშრომლობა, თუ არსებობს საერთო ღირებულებები, ფასეულობები. ჩვენც არ ველოდით ასეთ შედეგებს, ამ ყველაფერს გადახარშვა, გაანალიზება უნდა“. ამის შესახებ პოლიტიკური პლატფორმა–ახალი საქართველოს ლიდერმა გიორგი ვაშაძემ „ტვ–პირველზე“, გადაცემა „ინგა გრიგოლიას დღის ამბების“ ეთერში ისაუბრა.
„ „ახალი საქართველო“ აუცილებლად იქნება თვითმმართველობის არჩევნებზე. ჩვენ აქტიურად ვრჩებით პოლიტიკაში იმიტომ, რომ ვფიქრობთ ეს მნიშვნელოვანია ქვეყნის განვითარებისთვის. ბლოკთან დაკავშირებით პაატა ბურჭულაძესთან საუბარი არ მქონია. ჩვენ ბრძოლას განვაგრძობთ ყველა ვარიანტში, თუმცა რა სახით იქნება ეს ჯერ არ გადაგვიწყვეტია. რა თქმა უნდა უკეთესი იქნებოდა რომ პარლამენტში ვყოფილიყავით, მაგრამ ორი სამი თვის შექმნილ პარტიას საქართველოში სუბიექტის სტატუსი არ მიუღია, ეს მნნიშვნელოვანი მიღწევაა. ჩვენი გუნდისთვის კარგი გამოცდილება იყო. ამ ერთ წელში ჩვენ მოვიკრებთ ძალებს.
რაც შეეხება პაატა ბურჭულაძეს, მისთვისაც რთული იყო ამ ტალახის ატანა. ის სულ სხვა საქმეს აკეთებდა და პოლიტიკაში შემოვიდა. განსაკუთრებით აგრესიული კამპანია იყო პირადად მის მიმართ, რაც ბუნებრივია დისკომფორტს შეუქმნიდა ნებისმიერ ადამიანს. მე რატომღაც ენერგიის მოზღვავებას ვგრძნობ“.
გიორგი ვაშაძემ ყოფილ თანაგუნდელებზე, „ნაციონალური მოძრაობის“ გადაწყვეტილებაზე ისაუბრა.
„ „ნაციონალურ მოძრაობას“ გამარჯვება თუ უნდოდა, რეორგანიზაცია 2014 წლიდან უნდა დაწყებულიყო, სამწუხაროდ ეს არ მოხდა. მე ადრეც ვთქვი,რომ ამ ტიპის „ნაციონალური მოძრაობა“ იქნებოდა ხელშემწყობი ფაქტორი „ქართული ოცნებისთვის“ გამარჯვების კუთხით. სწორედ ამიტმ „ქართულმა ოცბეამ „ მიიღო ფაქტობრივად საკონსტიტუციო უმრავლესობა“.
მანანა ღოღობერიძე
