„მარნეულში დილის 5 საათიდან იყო მობილიზებული სპეცრაზმი. შევიდნენ ოჯახებში, დაარბიეს მათი სახლები და ავეჯი. ეს არის ზეწოლა მოსახლეობაზე,რომელმაც ხმა „ქართულ ოცნებას“ არ მისცა“. ამის შესახებ „ერთიანი ნაციონალური მოძრაობის“ მარნეულის მაჟორიტარი დეპუტატობის კანდიდატმა აჰმედ იმამყულიევმა „რუსთავი-2“-ზე, გადაცემა „კურიერის“ ეთერში ისაუბრა.
„ამას აკეთებს ბატონი კვირიკაშვილი და მღებრიშვილი. ეს არის პოლიტიკური შურისძიება მოსახლეობის წინააღმდეგ. ვეთანხმები,რომ კანონით ყველა დამნაშავე დაკავებული უნდა იყოს და პასუხი აგონ, თუმცა ჯერ ეს ფაქტი უნდა გამოიძიონ. ამ ყველაფერზე პასუხისმგებლობა „ქართული ოცნების“ მხარდამჭერებს ეკისრებათ. ხდებოდა გაყალბება და ეს რომ მოსახლეობამ დაინახა დაიწყო დაპირისპირება. „ქართული ოცნების“ წევრებმა მოსახლეობას ჯერ სიტყვიერი შურაცხყოფა მიაყენეს და შემდეგ ეს ფიზიკურ შეურაცხყოფაში გადაიზარდა.
ჩვენი იურისტები იმყოფებოდნენ დაკავებულებთან. გვაქვს ინფორმაცია,რომ სამი მათგანი არის ნაცემი. მათ თხოვდნენ აღიარებას, თითქოს იქ პროვოკაციას ხელი ჩვენმა პარტიამ და ჩვენმა მომხრეებმა შეუწყვეს. ეს ახალგაზრდები უბრალოდ ინციდენტის ადგილას იმყოფებოდნენ და ითხოვდნენ,რომ საარჩევნო უბანზე არ ყოფილიყო კანონის დარღვევა.
ეს ახალგაზრდები სწორედ ამ საარჩევნო უბნის ამომრჩევლები არიან და ეს არის ზეწოლა. არამგონია ეს „ქართული ოცნებისთვის“ რაიმე შედეგის მომტანი იყოს, ეს არასწორი მიდგომაა. რეგიონში ცხოვრობს ეთნიკური უმცირესობა, მათ ქართული არ იციან და უჭირთ ინფორმაციის გაგება, ამიტომ ჩვენ დეტალურ ინფორმაციას მივაწოდებთ დაკავებულების ოჯახის წევრებს. ეს ინციდენტი ჩემი კონკურეტის მიერ არის დაწყებული. გვაქვს ინფორმაცია,რომ 8 ოქტომბერს მარნეულის 48-ე უბანზე თამაზ ნავერიანის ძმისშვილიც იმყოფებოდა. ის გამგებელია და მას თან ახლდა კუნთმაგარი ადამიანები,რომლებიც მარნეულის მუნიციპალიტეტში არიან დასაქმებულები. ეს ყველაფერი დაფიქსირებულია, გვაქვს ვიდეო მასალები.
48-ე უბანზე თავიდან უნდა ჩატარდეს არჩევნები და მეორე ტური უნდა მოვიგოთ.ცესკოს მონაცემებით ჩვენ ათასობით ხმით წინ ვართ. თუ იქნება მეორე ტური, კიდევ უფრო დამაჯერებლად, სადღაც 80 %-ით უნდა მოვიგოთ,“-განაცხადა იმამყულიევმა.
მანანა ღოღობერიძე