შსს–ს ანტიკორუფციულმა სააგენტომ, ქრთამის აღების ფაქტზე, გარდაბნის რაიონის მუნიციპალიტეტის თანამშრომელი დააკავა. ამის შესახებ ინფორმაციას საქართველოს შინაგან საქმეთა სამინისტრო ავრცელებს.
მათი ინფორმაციით, შინაგან საქმეთა სამინისტროს ანტიკორუფციული სააგენტოს თანამშრომლებმა ჩატარებული ოპერატიულ-სამძებრო და საგამოძიებო მოქმედებების შედეგად გამოავლინეს და ქრთამის აღების ფაქტზე ამხილეს გარდაბნის რაიონის მუნიციპალიტეტის სამხედრო აღრიცხვისა და გაწვევის სამსახურის თანამშრომელი, 1962 წელს დაბადებული კატიბ ბაბაევი. შსს-ს ცნობით, ამჟამად იგი დაკავებულია.
როგორც სამინისტროში განმარტავენ, გამოძიებამ დაადგინა, რომ კატიბ ბაბაევმა, რომელიც მუშაობდა გარდაბნის რაიონის სამხედრო აღრიცხვისა და გაწვევის სამსახურში, მასზე კანონით მინიჭებული უფლებამოსილების დარღვევით და პირადი გამორჩენის მოტივით, ამავე რაიონში სამხედრო აღრიცხვაზე მყოფ მოქალაქეს, რეზერვისტის დროებითი მოწმობის, ე.წ. „სამხედრო ბილეთის“ გაცემის სანაცვლოდ მოსთხოვა და გამოართვა 300 ლარი.
გამოძიებას შინაგან საქმეთა სამინისტროს ანტიკორუფციული სააგენტო აწარმოებს სისხლის სამართლის კოდექსის 338-ე მუხლის პირველი ნაწილით, რაც სასჯელის სახით 6-დან 9 წლამდე თავისუფლების აღკვეთას ითვალისწინებს.
27.08.13
