რამდენიმე დღის წინ სოციალური ქსელების მომხმარებელმა, ლიკა შენგელიამ ანონიმური ჯგუფის -“SEEN V.-ის” სურათები გამოაქვეყნა, რომელზეც ასახულია, თუ როგორ ისერავენ მოზარდები ხელებს და ფეისბუკჯგუფის ადმინისტრატორის ე.წ. დავალებებს ასრულებენ. (?)
ფოტოებს თან მიმართვა ახლდა:
,,რამე უშველეთ ამათ, სანამ საიდანმე გადახტებიან. ბოლოს და ბოლოს, მშობლებმა მიაქციეთ შვილებს ყურადღება, რომ დადიან დაჩეხილი ხელებით. ხუმრობით იწყებენ და ცოტა ხანში აბაზანაში ვენებგადაჭრილი, წამლებით გაჟღენთილი და წყალში დამხრჩვალი ბავშვები დაგხვდებათ.”
როგორც ფოტოებიდან ჩანს, ადმინისტატორი ჯგუფის წევრ მოზარდებს სხვადასხვა ტიპის ,,დავალებას” აძლევს. ინსტრუქციებიდან ვკითხულობთ, რომ მოზარდებმა ხელი უნდა დაისერონ და ამოიტვიფრონ ლათინური ასო “V”, გარდა ამისა, გადმოხტნენ სიმაღლიდან და ვიდეო გადაიღონ-ატვირთონ, ასევე, ამ ჯგუფში რაც შეიძლება მეტი ადამიანი დაამატონ.
ჯგუფში ბლომად დევს ამ ტიპის შესრულებული დავალებები, ტინეიჯერების დასერილი ( ან ვითომ დასერილი) ხელები და ა.შ.
საზოგადოების ნაწილი ამ ჯგუფის არსებობასა და მიზნებს რეალურად მიიჩნევს და საშიშროებას ხედავს, ნაწილი კი ფიქრობს, რომ ეს ე.წ. ტროლინგია და ვიღაცამ უბრალოდ შავ იუმორს მიმართა.
აგრეთვე, ნაწილი ფიქრობს, რომ მსგავსი ფაქტების არსებობა სერიალ ,,ხელოვნური სუნთქვის” გაშარჟებაა.
რთულია ითქვას, რომელი მოსაზრებაა სწორი, თუმცა, ბოლო პერიოდში ტინეიჯერთა თვითმკვლელობებისა თუ თვითმკვლელობის მცდელობის ფაქტები საკმაოდ გახშირდა.