„მტკივნეულია ეკონომიკური პრობლემატიკა და განსაკუთრებით დასაქმების საკითხი, ასევე ეკონომიკური ზრდის არასაკმარისი ტემპი. ქვეყნის ეკონომიკურ განვითარებაზე პასუხისმგებელი არის მმართველი გუნდი და განსაკუთრებით ის მთავრობა, რომელსაც აქვს ამბიცია, რომ ჰყავს ძლიერი ეკონომიკური გუნდი“. ამის შესახებ საქართველოს პრეზიდენტმა გიორგი მარგველაშვილმა „რუსთავი 2“–ის ეთერში, გადაცემა „არჩევანში“ ისაუბრა.
„ფაქტობრივად ყველა ჩემი ნაცნობი ეძებს სამსახურს, ყველა ცდილობს დასაქმდეს, სამწუხაროდ ბევრი საზღვარგარეთ არის წასული. ეს ჩვენი ყოფის თანმდევი სერიოზული პრობლემაა. პარალელურად ლარის გაუფასურებამ და ეკონომიკის ზრდის დაბალმა ტემპმა იმოქმედა არა მხოლოდ სამუშაო ადგილების შექმნაზე, არამედ დოვლათის შექმნის პროცესსაც შეუქმნა პრობლემა. ჯერჯერობით ვერ გაიზარდა ვერც მცირე და საშუალო ბიზნესის წილი, რომელიც დასაქმების მაღალ მაჩვენებლებს უზრუნველყოფს. უცხოური ინვესტიციები, ტურიზმის მაჩვენებლები გაიზარდა, რამდენიმე ეკონომიკური პარამეტრი იმედის მომცემია, თუმცა ეს ცალკე მოვლენაა. რეალობა არის რამდენად მეტ ფულს ვხარჯავთ ბაზარზე, რამდენი ადამიანი ეძებს სამსახურს.
ეროვნული ბანკი მისდევს იმ ძირითად ტენდენციას, რომელიც გულისხმობს მცოცავი კურსის დაბალანსებას. ის ვერც აქამდე და ვერც მომავალში ვერ უზრუნველყოფს ლარის სტაბილურობას. ლარის სტაბილურობის განმსაზღვრელი არის ეკონომიკა და არა ეროვნული ბანკი. ამიტომ მე არც ქადაგიძის მოღვაწეობაში ვხედავდი დანაშაულის ნიშნებს. უახლოეს მომავალში უნდა ვნახოთ რეალური ინიციატივები, რეალური ნაბიჯები. პირველ რიგში ეს უნდა დავინახოთ პირველივე ეკონომიკურ დოკუმენტში, ბიუჯეტში,“–განაცხადა გიორგი მარგველაშვილმა.
მანანა ღოღობერიძე
