„3 %–იანი ეკონომიკური ზრდა არის მინიმალურზე მინიმალური, რაც ფაქტობრივად ნიშნავს, რომ ქვეყანა გაჩერებულია, მიუხედავად იმისა, რომ თითქოს ბევრი პროექტი ხორციელდება ეკონომიკის წასახალისებლად. ეს არის თავის დროზე ჩინოვნიკების მიერ მიღებული მცდარი გადაწყვეტილებების შედეგი“. ეროვნული ვალუტის გაუფასურების მიზეზებზე და მთავრობის არასწორი ეკონომიკური პოლიტიკის შესახებ ეკონომიკის ექსპერტმა პაატა შეშელიძემ ტელეკომპანია „იმედზე“, გადაცემა „ქრონიკის“ ეთერში ისაუბრა.
„ლარის გაუფასურებას აქვს უცვლელი მიზეზი, ეს არის ეროვნული ბანკის მცდარი პოლიტიკა და მთავრობის დეფიციტური ხარჯვა. ეროვნული ბანკის მხრიდან მუდმივად ხდება ბაზარზე ლარის მიწოდება მაშინ, როდესაც მასზე მოთხოვნა არ არის. აგვიანებენ რეაქციას, ყოველთვის აქვთ გაუგებარი ახსნა –განმარტება თუ რა ხდება, მიზეზი არის ბუნდოვანი. რაღაცას გვიმალავენ, ფარულად აკეთებენ, საქმე აქვთ გადადებული. საბოლოო ჯამში ვიღებთ დაძაბულ გარემოს, უცხოური დოლარის დეფიციტს და ხელოვნურად წახალისებულ მოთხოვნას. ეს არ არის წვიმა, რომ ველოდოთ თავისით როდის გადაიღებს, ეროვნულ ბანკს შეუძლია მიიღოს კონკრეტული გადაწყვეტილებები და შეცვალოს ვითარება.
მთავრობა მუდმივად სესხულობს შიდა ბაზარზე ლარს, რომელიც სჭირდება, არ აპირებენ გადახედონ თავიანთ ბიუჯეტს და შექმნან ისეთი, რომელიც არ მოითხოვს სესხების აღებას. პოლიტიკა, რომელიც ხელს არ უწყობს ეკონომიკურ ზრდას, არ ტოვებს იმედს,რომ ვითარება მალე გამოსწორდება. ეროვნული ბანკი არის დამატებითი ბერკეტი მთავრობის ხელში, როდესაც მთავრობას შეუძლია ჩვენს ჯიბეებში ხელი ჩაყოს და როცა უნდა ამოგვაცალოს დანაზოგი. პრობლემის გადაწყვეტა არის პიროვნებებში, მათ ხედვებში.
ეროვნული ბანკი, ეროვნული ვალუტა საერთოდ უნდა გაუქმნდეს, უნდა გადავიდეთ დოლარზე, რომელიც არის საერთაშორისო ფული და ადგილობრივ ბიუროკრატიასთან ამდენი ჭიდაობა აღარ დაგვჭირდება. ძალაუფლება უნდა დაიბრუნოს ხალხმა, ეროვნულმა ბანკმა უბრალოდ უნდა გამოისყიდოს მიმოქცევაში არსებული ყველა ლარი. ანგარიშზე დაგვიჯდება დოლარი და ისევე გამოვიყენებთ, როგორც დღეს ლარს ვიყენებთ. ამით არანაირი პრობლემა არ შეიქმნება, მოგვშორდება ბიუროკრატია, დაძაბულობა, ნაკლები გავლენა ექნება ადგილობრივ ბიუჯეტს მონეტარულ პოლიტიკაზე. პარალელურად მიმოქცევაში უნდა გავუშვათ ძვირფასი ლითონების გამოყენება,“–განაცხადა პაატა შეშელიძემ.
მანანა ღოღობერიძე
