ვიკიპედიასა და საქართველოს ბიოგრაფიულ ლექსიკონში მის შესახებ ძალიან მწირი ინფორმაცია არსებობს, მიუხედავად ამისა, ბოლო წლის განმავლობაში ქვეყანაში მიმდინარე არცერთ მნიშვნელოვან მოვლენას მისი კომენტარის გარეშე არ ჩაუვლია. „ირაკლი კობახიძის განცხადებით საპარლამენტო არჩევნებში ქართულმა ოცნებამ დამაჯერებელი გამარჯვება მოიპოვა“ „პრეზიდენტის უფლებამოსილების ვადას დროზე ადრე არავინ შეეხება,აცხადებს ირაკლი კობახიძე“ „კობახიძის თქმით კონსტიტუციას დახვეწა სჭირდება და „ქართული ოცნება ამას აუცილებლად გააკეთებს.“ „ვინ არის ირაკლი კობახიძე: „ჩვენი დროის გმირი“, თუ „ქართულ ოცნებაში“ ჩანერგილი გაუგებრობა?!“ – ამგვარი სათაურებით მედიაში გავრცელებულ არაერთ სტატიას შეხვდებით. უნდა აღინიშნოს, რომ აქტიური დაინტერესება მისი პერსონის მიმართ მას შემდეგ დაიწყო, რაც მმართველი პარტიის, „ქართული ოცნება – დემოკრატიული საქართველოს“ აღმასრულებელ მდივნად დაინიშნა.
ირაკლი კობახიძე დაიბადა 1978 წლის 25 სექტემბერს. 38 წლის პოლიტიკოსის რეზიუმე საკმაოდ დატვირთული და მრავალფეროვანია. გერმანიის დიუსელდორფის უნივერსიტეტის მაგისტრი და შემდგომ დოქტორი. საქართველოს კერძო და სახელმწიფო უნივერსიტეტების მიწვეული და ასოცირებული პროფესორი, გაეროს რეგიონული და მუნიციპალური განვითარების პროექტის მენეჯერი და ა.შ… მიუხედავად იმისა, რომ მისი პოლიტიკური კარიერა მხოლოდ 2012 წელს დაიწყო, დღეს უკვე „ქართული ოცნების აღმასრულებელი მდივანი და პოლიტიკური საბჭოს წევრია.
დეტალები იხ. 41.ge/party
„იგი თავიდანვე იყო პარტიის ერთ-ერთი აქტიური წევრი – 2012 წელს მუშაობდა “ქართული ოცნების” საზოგადოებრივ სამუშაოებზე და კონსტიტუციაში შესატან ცვლილებებზე. არის აღმოსავლეთ ევროპის სასწავლო უნივერსიტეტის პროფესორი, ასევე კავკასიის სამართლის სკოლის ასოცირებული პროფესორი. ირაკლი კობახიძეს აქვს ათამდე სამეცნიერო ნაშრომი, მათ შორის ის ორი სახელმძღვანელოს ავტორია. რაც მთავარია, გახლავთ პატიოსანი და ღირსეული პიროვნება“,– ასე ახასიათებს კობახიძეს „ლიბერალის“ კორესპონდენტთან პოლიტიკური თანამებრძოლი კახა კალაძე.
უნდა აღინიშნოს, რომ ჟურნალისტთა ნაწილი მიიჩნევს, რომ ირაკლი კობახიძეს, როგორც პოლიტიკოსს მედიასთან ურთიერთობა უჭირს. ტელეკომაპანია რუსთავი2–ის ჟურნალისტები სხვადასხვა გადაცემაში სხვადასხვა თემაზე საუბრისას ხშირად ადანაშაულებენ მას დემაგოგობასა და პასუხის შეგნებულად არიდებაში და ამასთანავე ცდილობენ, ირონიით გაიხსენონ მისი „კუდიანი კითხვები“ კი თუ არა? კი თუ არა? კი თუ არა? უცნაურია, მაგრამ ამ ტიპის კითხვები, თითქოს, უკვე ასოციაციურად ირაკლი კობახიძეს უკავშირდება.
როდესაც ქვეყნის ერთ–ერთი მნიშვნელოვანი პოლიტიკური ფიგურა ხდები, ბუნებრივია, საზოგადოებაში ჩნდება ინტერესი ოჯახის მიმართ. ირაკლი კობახიძის შემთხვევაშიც ოპონენტებმა აპელირება მოახდინეს მამის, გია კობახიძის, პოლიტიკურ მიკუთვნებულობაზე. ისინი ამბობდნენ, რომ მამა–შვილის ოპოზიციურ პარტიებში ყოფნა ინტერესთა კონფლიქტის საფუძველი შეიძლება გამხდარიყო, ხოლო მას შემდეგ, რაც ირაკლის მამამ პარტია „დემოკრატიული მოძრაობა–ერთიანი საქართველო“ დატოვა, მედია და ოპოზიციური პარტიები აღნიშნავდნენ, რომ მამამ ეს ნაბიჯი შვილისთვის პოლიტიკური კარიერის ხელშესაწყობად გადადგა.
კობახიძეების ოჯახში აღნიშნავენ, რომ მათთვის მნიშვნელოვანი სტატუსი უნივერსიტეტელობაა. ირაკლი, მისი და, ქეთევან კობახიძე, მამა, და მეუღლე თბილისის სახელმწიფო უნივერსიტეტის კურსდამთავრებულები არიან.
მამა – გიორგი კობახიძეა, იგი ცნობილი პოლიტიკური მოღვაწე გახლავთ, ეროვნული მოძრაობიდან წამოსული, ერთერთი პარტიის ლიდერი, ყოფილი ვიცე–სპიკერი.
დედა– ქალბატონი თამარ ზაალიშვილი აღმოსავლეთ ევროპის უნივერსიტეტის ასოცირებული პროფესორია.
და – ქეთევან კობახიძე, თსუ–ის სოციალურ და პოლიტიკურ მეცნიერებათა ფაკულტეტის კურსდამთავრებული, ამჟამად ჟურნალისტი და მხატვარი.
მეუღლე – ნატალია მოწონელიძე, თბილისის სახელმწიფო უნივერსიტეტის კერძო სამართლის მიმართულების ასისტენტ–პროფესორია.
დეტალები იხ. www.tsu.ge
მიუხედავად იმისა, რომ ოჯახში არაერთი ცნობილი პოლიტიკოსია, ისინი ერთხმად თანხმდებიან, რომ ოჯახში მთავარი ყურადღება ეთმობა პატარებს: 5 წლის გიორგისა და ერთი წლის ნიკოლოზ კობახიძეს.
„ოჯახის რეალიზებაში ისინი წამყვან როლს ასრულებენ“,– აღნიშნავს „რეპორტიორის“ ჟურნალისტთან ინტერვიუში ირაკლი კობახიძე.
პოლიტიკური ასპარეზობის მიღმა მის პიროვნებაში ბვერი საინტერესო ფაქტი და დეტალი იმალება. დღეს მმართველი პარტიის წამყვანი ფიგურაა, წლების წინ მუსიკალურ სასწავლებელში დადიოდა და ფორტეპიანოს მიმართულებით შვიდწლედი დაამთავრა. პროფესიული თვალსაზრისით არ უმუშავია, მაგრამ ისწავლა გიტარაზე დაკვრა, გამოცემული აქვს რომანი „დაბრუნება ტერანოვაში“. იყო დაინტერესებული კულინარიითაც. რთულია, განსაზღვრო რა დრო რჩება ახლა პოლიტიკოსს სამზარეულოში საქმიანობისთვის, მაგრამ რომ ერთ–ერთ ინტერვიუში კობახიძე იმისაც კი აღნიშნავს, რომ საახალწლო სუფრაზე საცივი და გოზინაყი სწორედ მისი დამზადებულია.
„მიუხედავად იმისა, რომ ძალიან დაკავებულია, ზოგჯერ კი მთელი ღამე მუშაობს, იმდენად მზრუნველია, რომ მუდამ ახერხებს, შეავსოს ეს დრო და ჩვენთან ერთადაც ხშირად იყოს. სიმართლე გითხრათ, თავადაც მიკვირს, როგორ ახერხებს ამ ყველაფერს“,– ამბობს ირაკლის მეუღლე ნატალია მოწონელიძე.
2016 წლის საპარლამენტო არჩევნების დასრულების შემდეგ მედიაში ირაკლი კობახიძესთან დაკავშირებით მთავარი კითხვა ჯერ კიდევ აქტუალურია: გახდება თუ არა ის პარლამენტის თავმჯდომარე? კი თუ არა? კი თუ არა? კი თუ არა?
ნანუკა მაღლაკელიძე
