„ამერიკელმა ხალხმა გამოხატა თავისი ნება და ხმა მისცა ცვლილებებს. ამერიკელი ხალხის მესიჯები უკავშირდება ქვეყნის კიდევ უფრო მეტ გაძლიერებას. ამერიკის გაძლიერება არის ყველა მისი პარტნიორის ინტერესში. ბუნებრივია ჩვენი სტრატეგიული პარტნიორი ამერიკის შეერთებული შტატების სიძლიერე აისახება ჩვენი ქვეყნის სიძლიერეზეც“. ამის შესახებ საქართველოს საგარეო საქმეთა მინისტრმა მიხეილ ჯანელიძემ ტელეკომპანია „იმედზე“, გადაცემა „ღია ეთერში“ ისაუბრა.
„ჩვენ ურთიერთობებს ვაყალიბებთ უკვე 25 წელია, რომელიც ეფუძნება ნდობას, ურთიერთსარგებელს, საერთო ინტერესს. განსაზღვრულია ის სფეროები, რითიც ვართ ერთმანეთისთვის სასარგებლო. საქართველოს დემოკრატიული სახელმწიფო ინსტიტუტების და ეკონომიკის ჩამოსაყალიბებლად ჰქონდა ამერიკის დიდი მხარდაჭერა. ჩვენ მოველით, რომ ეს პარტნიორობა გაგრძელდება, ჩვენს შორის არის მაღალი დონის სავაჭრო და საინვესტიციო დიალოგი. ამ დიალოგის ფარგლებში ვიხილავთ ყველა შესაძლებლობას ურთიერთსარგებლიანი სავაჭრო და ეკონომიკური ურთიერთობებისთვის.
დავაკვირდებით ახალი ადმინისტრაციის პოლიტიკას, რაზე იქნება ორიენტირებული. საქართველო ამერიკული კომპანიებისთვის ყოველთვის იყო საინტერესო ადგილი, ამერიკის საელჩო პალატა, რომელიც ერთ–ერთი ყველაზე ძველი და მძლავრი ორგანიზაციაა, აღნიშნავს საქართველოში დაფუძნებიდან 18 წლის იუბილეს. ჩვენ ამერიკულ ბიზნესს მთელ რეგიონში ვთავაზობთ დასაყრდენ პლატფორმას და დარწმუნებულები ვართ, რომ ახალი პრეზიდენტის მიდგომებიც იქნება დაფუძნებული სავაჭრო და ეკონომიკური კავშირების განვითარებაზე.
ნატო იყო და არის ერთ–ერთი უმნიშვნელოვანესი გარანტორი ტრანსატლანტიკური უსაფრთხოების, განვითარებისთვის. ამერიკის ადმინისტრაცია ყოველთვის დიდ და გადამწყვეტ როლს თამაშობდა ამ ორგანიზაციის სიმტკიცის მიმართულებით. დარწმუნებულები ვართ, რომ ეს ორგანიზაცია გააგრძელებს განვითარებას. ამ წლების განმავლობაში ამერიკისგან დიდი დახმარება მივიღეთ როგორც პოლიტიკურად, ასევე ტექნიკურად და ფინანსურად იმისათვის, რომ დავახლოვებოდით ალიანსის სტანდარტებს. ჩვენი მხრიდანაც დიდ კონტრიბუციას ვიღებთ ევროატლანტიკური უსაფრთხოებისთვის და ველით, რომ ამის დაფასება მოხდება.
ბუნებრივია ყოველი ახალი ადმინისტრაცია ცდილობს დაძაბულობის განმუხტვას, ურთიერთობების დარეგულირებას. თუმცა ამავე დროს დაცული უნდა იყოს საერთაშორისო სამართლის პრინციპები. ახლად არჩეულმა პრეზიდენტმა ხაზგასმით თქვა, რომ შეეცდება კონფლიქტების დიალოგის საფუძველზე მოგვარებას და ასევე იქნება სამართლიანობის ხელშემწყობი,“–განაცხადა მიხეილ ჯანელიძემ.
მანანა ღოღობერიძე