„ნაწარმოები ბავშვს ამზადებს სამყაროსთვის, სადაც არ არის მხოლოდ სიკეთე. რეალურ ცხოვრებაში სიკეთე ხშირად მარცხდება და მივცეთ მას საშუალება ზღაპრებში მაინც გაიმარჯვოს“. პოეტი პაატა შამუგია ქართული ხალხური ზღაპრების შესახებ განათლების მინისტრის განცხადებას გამოეხმაურა და ზღაპრების მნიშვნელობაზე „ტვ პირველზე“, გადაცემა „შეკითხვის დროს“ ეთერში ისაუბრა.
„ზღაპრებში ასახულია იდეალური სამყარო, იქ სიკეთეც და ბოროტებაც იდეალურ მომენტამდეა მიყვანილი და მოზრდილ ასაკში გვეჩვენება ძალადობა. მგონია, რომ საკითხი პირიქით უნდა დაისვას. ეწევა თუ არა თანამედროვეობა ზღაპრებს. მხატვრული ძალადობა უნდა გავარჩიოთ რეალური ძალადობისგან.
მინისტრის მიმართ მიდგომაც ზედმეტად მკაცრი მგონია. ადამიანმა თქვა განსხვავებული აზრი, ამაში ტრაგედია არაფერია. ჩვენ ჩინოსნებისგან ძირითადად მიჩვეულები ვართ ეროვნულ, პატრიოტულ, პატივმოყვარეობაზე მოღიტინე შეფასებებს. სასიამოვნოა, რომ ვიღაცას აქვს სურვილი მოჯადოებული წრე გაარღვიოს. თუმცა ეს არ იყო კვალიფიციური განცხადება. ცუდია, რომ არ დაეკითხა ფოლკლორისტებს, მითოლოგებს.
ბავშვებს აქვთ მითოლოგიური აზროვნება და ის, რაც ჩვენს ასაკში შეიძლება იყოს მტკივნეულად აღქმადი, ბავშვისთვის არის ჩვეულებრივი სამყარო. ის, რომ ბავშვს აქვს ბაძვის ცდუნება, გასარკვევია. სწავლის მეთოდოლოგიის შეცვლაში საბავშვო ფსიქოლოგები უნდა ჩაერთონ. კომბლე კი არ უნდა შეიცვალოს, კომბლეს სწავლების მეთოდიკა უნდა შეიცვალოს. მაშინ კვაჭი კავაჭანტირაძეც უნდა გადავაგდოთ, სადაც თაღლითობაა აღწერილი. არსებობენ დადებითი და უარყოფითი პერსონაჟები, ვისთვის ნაცარქექია დადებითია, ვისთვის უარყოფითი. ზოგჯერ უნდა დაგვთრგუნოს კიდეც ნაწარმოებმა,“–განაცხადა პაატა შამუგიამ.
მანანა ღოღობერიძე
