„არასოდეს, ჩემი საქმიანობის არც ერთ ეტაპზე მიზანმიმართულად არ მიბრძოლია თანამდებობის დაკავებისთვის. 4 წელი საკმაო დროა იმისთვის, რომ თუ მოინდომებ მიზანს მიაღწევ. სულ ერთი ნაბიჯი იყო პარლამენტის თავმჯდომარეობამდე, თუმცა მე ამისთვის არ მიბრძოლია“. ამის შესახებ „ქართული ოცნების“ წევრმა მანანა კობახიძემ „ტვ პირველზე“, გადაცემა „ინგა გრიგოლიას დღის ამბების“ ეთერში ისაუბრა.
„მე არ ვეკუთნი იმ კატეგორიის ადამიანებს, რომ წყენის გამო რაღაც გადაწყვეტილებები მივიღო. არ მივეკუთვნები იმ კატეგორიას, რომელიც შიდა საუბრებს გარეთ გამოიტანს, მიმოწერებს და მეილებს გაასაჯაროვებს. არის რაღაც, რაც ყოველთვის უნდა დარჩეს გუნდის შიგნით. დეპუტატებს, საქართველოს პარლამენტის წევრებს საზოგადოების წინაშე მეტი პასუხისმგებლობა გვაქვს. გუნდის არც ერთი წევრისგან რაიმე ტიპის წყენის საფუძველი არ მიგრძვნია.
არ მგონია, რომ ჩვენი პოლიტიკაში შემოსვლა განპირობებული უნდა იყოს მთავარი მიზნით, თანამდებობების დაკავებით. ბევრი საკითხია უფრო აქტუალური, ვიდრე ის, თუ რა თანამდებობებს დაიკავებს კონკრეტული პირი პარლამენტში. როგორც 2012 წელს, ახლაც ჩვენი ერთობა მნიშვნელოვანია, რომ ვუპასუხოთ მთავარ გამოწვევებს, ლარის კურსს, ბიუჯეტის თემებს, ეკონომიკურ ზრდას. 2012 წელს პირველი ვიცე–სპიკერობა ჩემთვის დიდი გამოწვევა იყო, ვფიქრობ შევძელი და თავი გავართვი ამ ვითარებას. ყოველთვის პრინციპების ერთგული ვიყავი და ვასრულებდი უფლება–მოვალეობებს.
ადამიანის უფლებათა სფერო ჩემი საქმეა, ამას ვაკეთებდი პარლამენტამდე და მომავალშიც გავაგრძელებ. არ არის აუცილებელი მაინც და მაინც პოზიციაზე ყოფნა. ჩემი თავის რეალიზებას ნამდვილად შევძლებ ყოველთვის. ბატონ გიორგისთან მქონდა საუბარი, მისი მხრიდან თხოვნაც იყო, რომ დავთანხმებოდი ამ პოზიციას, შესაძლოა გავანაწყენე კიდეც. ყველაზე დიდი მანდატი ის არის, რომ ადამიანების ნდობა გვაქვს“.
მანანა კობახიძემ ეროვნული ვალუტის გაუფასურების მიზეზებზეც ისაუბრა.
„ადამიანებს ვისაც ხელფასი და პენსია ლარში აქვთ, არანაირად აწყობთ დოლარის გაძვირება. მოსახლეობა გრძნობს, რომ არის პრობლემები. მნიშვნელოვანია კონკრეტული გეგმა, მომავალი წლის ბიუჯეტის სწორად გახარჯვა. მთავრობის ნდობის გამოცხადებისთანავე უნდა მივიღოთ სახელმწიფო ბიუჯეტის კანონი, აუცილებლად უნდა შემცირდეს დანახარჯები, მოხდეს ოპტიმიზაცია, ხელი უნდა შეეწყოს ექსპორტს. აუცილებელია ეკონომიკის სტიმულირება, ინვესტიციების მოზიდვა. დარწმუნებული ვარ ეს პრობლემა დაიძლევა“.
მანანა ღოღობერიძე
