რელიგიის საკითხთა სახელმწიფო სააგენტოს ინიციატივით ტოლერანტობის საერთაშორისო დღესთან დაკავშირებით კათოლიკოს-პატრიარქმა ილია მეორემ საქართველოში არსებული რელიგიური ორგანიზაციების წარმომადგენლები საპატრიარქოში მიიღო.
მართლმადიდებლური ეკლესიის წინამძღოლმა 16 ნოემბერს დიდი და მნიშვნელოვანი დღე უწოდა, რომელიც სხვადასხვა აღმსარებლობისა და ეთნოსის ადამიანებს აერთიანებს და ხაზს უსვამს ჩვენს მრავალსაუკუნოვან ერთობასა და ჩვენი ქვეყნის ტრადიციას.
შეხვედრაზე მიწვეულმა სასულიერო პირებმა ერთხმად აღნიშნეს, რომ მსგავსი შეხვედრები კონფესიებს შორის ურთიერთპატივისცემისა და შემწყნარებლობის, სიყვარულისა და მეგობრობის განმტკიცებას უწყობს ხელს. პატრიარქს კი მეგობრობისა და სიყვარულისა საუკეთესო მაგალითი უწოდეს.
„საქართველო ისტორიულად ტოლერანტული და შემწყნარებლური სახელმწიფო იყო, არის და სხვადასხვა რელიგიების სასულიერო ლიდერების გულწრფელი დიალოგის შედეგად მომავალშიც ასე იქნება. მსოფლიოში ეთნიკურ და რელიგიურ ნიადაგზე წარმოშობილი ყველა კონფლიქტის მიზეზი ტოლერანტობის და დიალოგის არ ქონაა და საქართველო ამ კუთხით სანიმუშო ქვეყანაა, “- აღნიშნეს მუსლიმთა სამმართველოს სასულიერო ლიდერებმა სიტყვით გამოსვლისას.
ზაზა ვაშაყმაძემ რელიგიურ ორგანიზაციებს ამგვარი შეხვედრების ტრადიციად დამკვიდრება შესთავაზა, რათა ყოველ წელს 16 ნოემბერი სხვადასხვა რელიგიურ ორგანიზაციაში ყველა კონფესიამ ერთად აღინიშნოს და ამით განამტკიცოს ურთიერთპატივისცემა და სიყვარული.
„დღეს სახელმწიფო იცავს და აგრძელებს იმ ტრადიციას, რასაც ჩვენი წინაპრები სხვადასხვა ეროვნებისა და კონფესიის წარმომადგენლებთან ერთად მრავალი საუკუნის განმავლობაში ქმნიდნენ. ქვეყნის რელიგიური პოლიტიკა, ყველა გადაწყვეტილება, რომელიც სახელმწიფომ კონფესიებთან დაკავშირებით მიიღო, იქნება ეს რელიგიური ორგანიზაციების საქმიანობის ფინანსური ხელშეწყობა თუ ქონებრივი საკითხების მოგვარება, სწორედ მშვიდობიან თანაცხოვრებას, თითოეული ჩვენგანის რელიგიისა და მისი გამოხატვის თავისუფლებას ეფუძნება, რელიგიური საქმიანობის ხელშეწყობას ემსახურება,“- რელიგიის სააგენტო.
შეხვედრას ესწრებოდნენ: რამინ იგიდოვი – საქართველოს შეიხი; იასინ ალიევი – აღმოსავლეთ საქართველოს მუფტი; ბეგლარ ქამაშიძე – დასავლეთ საქართველოს მუფტი; ჰორენ ჰოვანისიანი – სომეხთა სამოციქულო მართლმადიდებელი ეკლესიის არქიმანდრიტი; რახამინ მურდუხაშვილი – რაბინი; მერაბ ჩანჩალაშვილი – თბილისის დიდი სინაგოგის გამგეობის თავმჯდომარე; ჰანს იოჰან კიდერლენი – საქართველო ევანგელურ-ლუთერული ეკლესიის ეპისკოპოსი; მაჩეი მამაი – ლათინ-კათოლიკეთა კავკასიის სამოციქულო ადმინისტრაციის მღვდელმსახური; შმაგი ჭანკვეტაძე – საქართველოს ევანგელურ-პროტესტანტული ეკლესიის პასტორი; დიმიტრი ფირბარი – იეზიდთა სასულიერო კრების თავმჯდომარე; ჯამლეტ ხუხაშვილი.
შეგახსენებთ, რომ ტოლერანტობის საერთაშორისო დღე ყოველწლიურად აღინიშნება, როგორც კულტურებსა და ცივილიზაციებს შორის პატივისცემის, დიალოგისა და თანამშრომლობის აუცილებლობის შეხსენება. ტოლერანტობის დღის აღნიშვნა 1996 წელს გაეროს გენერალური ასამბლეის ინიციატივით დაიწყო. 1995 წლის 16 ნოემბერს იუნესკომ ტოლერანტობის პრინციპების შესახებ დეკლარაცია მიიღო.
სოფიკო ნინიკაშვილი
