„კანონმდებლებს ვთავაზობთ დროებითი ნორმის შემოღებას, სანამ აღდგება საქარველოს იურისდიქცია და რუსეთი საერთაშორისო ნორმების შესაბამისად აღიარებს ჩვენი ქვეყნის საზღვრებს. ჩვენი შეთავაზებით უნდა აიკრძალოს გადაცემა, რომელიც რუსული პროპაგანდის ელემენტებს შეიცავს, რაც საფრთხეს უქმნის ქვეყნის დამოუკიდებლობას, სუვერენიტეტს და წარმოადგენს ოკუპაციის ლეგიტიმაციის საფრთხეს“. ამის შესახებ არასამთავრობო ორგანიზაცია „საერთაშორისო გამჭვირვალობა-საქართველოს“ წევრმა ლიკა საჯაიამ „ტვ პირველზე“, გადაცემა „ვახო სანაიას დღის ამბების“ ეთერში ისაუბრა.
„სამწუხაროდ მაუწყებლის შესახებ კანონში არ არის მსგავსი ნორმა, რომელიც ასეთი შემთხვევებისთვის იქნება გამოყენებული. კანონი ითვალისწინებს სიძულვილის ენის თვითრეგულირებას, ეთნიკური, რელიგიური შუღლის გაღვივებას. თუმცა ეს არ არის საკმარისი პრო-რუსული პროპაგანდის რეგულირებისთვის. თუმცა არ გვაქვს ილუზია, რომ ამ კანონით ყველანაირ პროპაგანდის პრობლემას მოვაგვარებთ. გვქონდა შეხვედრა მედია-ექსპერტებთან, დარგის სპეციალისტებთან, ვიმსჯელეთ უნდა არსებობდეს რეგულაციები თუ თვითრეგულაციები. მედიის წარმომადგენლები მიიჩნევენ, რომ ჯობს მაუწყებლებმა თავად შეადგინონ საინფორმაციო ბადე და განსაზღვონ რომელი პროგრამა შეიცავს პროპაგანდის რისკებს. ჩვენ ვიზიარებთ მათ პოზიციას, რადგან გამოხატვის თავისუფლების შეზღუდვას ფრთხილად უნდა მოვეკიდოთ. კანონის დარღვევის შემთხვევაში სასამართლოსთვის მიმართვის უფლება ექნება ყველა დაინტერესებულ პირს, ყველა მოქალაქეს.
რუსული პროპაგანდა დიდი თავის ტკივილი და საფრთხეა სხვა ქვეყნებისთვისაც. თუმცა ჩვენს შემთხევვაში ეს საკითხი განსაკუთრებული სიმწვავით დგას. გვაქვს ოკუპირებული ტერიტორიები, ამიტომ უნდა არსებობდეს სპეციალური საკანონმდებლო ნორმა, სანამ ამ სახელმწიფოსთან სპეციალური ურთიერთობის რეჟიმი გვაქვს,“-განაცხადა ლიკა საჯაიამ.
მანანა ღოღობერიძე
