მოქალაქეთა ჩართულობაზე დაფუძნებული მმართველობის დამკვიდრების პროცესში კიდევ ერთი მნიშვნელოვანი ნაბიჯი გადაიდგა. თბილისის მთავრობამ ღია მმართველობის პარტნიორობის (OGP) ფარგლებში, დაამტკიცა თბილისის 2017 წლის სამოქმედო გეგმა, რომელსაც თბილისი მიმდინარე წლის 7-9 დეკემბერს პარიზის სამიტზე წარუდგენს საერთაშორისო საზოგადოებას.
სამოქმედო გეგმის შემუშავების პროცესში ჩართული იყო ყველა დაინტერესებული პირი, სამოქალაქო სექტორისა თუ სხვა საჯარო დაწესებულების წარმომადგენელი და მოქალაქეთა სხვადასხვა ჯგუფი. აღნიშნულ ჯგუფებთან საჯარო კონსულტაციების საფუძველზე, შედგა სამოქმედო გეგმა, რომელიც მოიცავს 2017 წლისთვის შესასრულებელ 5 ძირითად ვალდებულებას. იხ. 2017 წლის სამოქმედო გეგმა.
თბილისი აღნიშნულ ვალდებულებებს იღებს ღია მმართველობის პარტნიორობის (OGP) საპილოტე პროგრამის ფარგლებში და მათი შესრულება აამაღლებს ინფორმაციის ხელმისაწვდომობასა და საზოგადოებრივ ჩართულობას თბილისის მერიის მმართველობით საქმიანობაში. თბილისი გახდება იმ დიდი ქსელის ნაწილი, რომელიც აერთიანებს სხვა ადგილობრივ ხელისუფლებებს, სამოქალაქო ორგანიზაციებს, სამეცნიერო საზოგადოებასა და სხვა პირებს, რომლებიც მიზნად ისახავენ შეცვალონ და გააუმჯობესონ მმართველობის კულტურა და „ღია მმართველობის პარტნიორობას“ ამ მიზნის მიღწევის საშუალებად მოიაზრებენ. დამატებითი იმფორმაციისთვის იხილეთ ვებ-გვერდი: http://ogp.tbilisi.gov.ge
