უახლოეს დღეებში გახდება ცნობილი, სად გადავა სამუშაოდ ეკონომიკისა და მდგრადი განვითარების სამინისტრო. როგორც ჟურნალისტებს ეკონომიკისა და მდგრადი განვითარების მინისტრმა დიმიტრი ქუმსიშვილმა განუცხადა, ინვესტორთან შეთანხმდნენ, რომ სულ მცირე 3 თვე დარჩებიან იმ შენობაში, სადაც დღეს არიან. “ამ წუთში 2 ალტერნატივა გვაქვს და უახლოეს დღეებში მოგვიწევს ჩამოყალიბება”, – განაცხადა ქუმსიშვილმა. თბილისში, ჭანტურიას ქუჩა 12-ში მდებარე საქართველოს ეკონომიკისა და მდგრადი განვითარების სამინისტროს შენობა მიმდინარე წლის ივნისში აუქციონზე 9 450 000 აშშ დოლარად გაიყიდა. შენობა “ჰუალინგ ჯგუფმა” შეიძინა. “ჰუალინგ ჯგუფი”, აუქციონის პირობებით გათვალისწინებული საინვესტიციო ვალდებულებების შესაბამისად სამი წლის ვადაში არანაკლებ 100-ნომრიანი სასტუმროს მოწყობას გეგმავს.
