მაღაზიაში შესვლისთანავე ფერადი, მხიარული ფერები მოგჭრით თვალს. ყოველთვის ხალხმრავლობაა. საყვარელი ნივთის წაღების შემდეგ, მაღაზია რამდენიმე წუთით მყიდველებისგან იცლება და შეგიძლიათ თვალი შეავლოთ თაროებზე განთავსებულ ჩანთებსა თუ ფერად-ფერად სამკაულებს.თაროებიდან სხვადასხვა ზღაპრისა თუ მულტფილმის გმირი გვიცქერის საყვარელი წარწერებით: „ეს სიყვარული შენ რომ მაჩუქე, კიდევ მინდა“, „და მე ვიღიმი… უბრალოდ ვიღიმი.“. სულ ცოტას გვერდზე თუ გავიხედავთ დავინახავთ ხელჩაკიდებულ საუკეთესო მეგობრებს, რომლებიც შორიდან სამუდამო მეგობრობას გვპირდებიან – „ჩვენ ვიქნებით საუკეთესო მეგობრები სიბერემდე, ვიდრე სკლეროზი არ დაგვაშორებს.. მერე კი თავიდან დავმეგობრდებით“. შესაძლოა იქვე დაინახოთ ჩანთები და ბლოკლნოტები ინგლისური წარწერებით, რომლებიც სხვადასხვა ქვეყანაში გამგზავრებას ელოდებიან – “ Happines is only real when shared!”, “Love is when the soul starts to sing and the flowers of your life bloom on their own”. უამრავი ნივთია, პატრონიც სხვადახვა ჰყავთ, თუმცა ყოველი მათგანის ისტორია ახალგაზრდა წყვილიდან იწყება. წყვილიდან, რომელთა მეგობრობა ბავშვობიდან დაიწყო, ბიზნესი კი სიყვარულიდან.
ლალი თვალიაშვილი და დემეტრე მარხვაიძე სამკაულებს მინერალებისა და ყვავილებისგან ამზადებენ. ხატავენ ჩანთებს, ბლოკნოტებს და კედლის დეკორაციებს, ხატავენ პატარა ავტომობილებზე. ახალგაზრდა წყვილი ხელნაკეთი ნივთების ბიზნესის წამოწყების იდეამდე მოგზაურობის სიყვარულმა მიიყვანა.
„მე და დემეტრემ ერთმანეთი სკოლაში, 15 წლის წინ გავიცანით. ერთად ჩავაბარეთ უნივერსიტეტში და ძალიან ბევრს ვფიქრობდით, ერთდ გაგვეკეთებინა მცირე ბიზნესი, რაც პოზიტიური,საინტერესო და ამავე დროს სასარგებლო იქნებოდა. და რაც მთავარია, სიამოვნებას მოგვანიჭებდა მისი კეთება. ძალიან ბევრს ვმოგზაურობდით, ამიტომ ხელოვნება და რაღაც ახლისა და განსაკუთრებულის შექმნა ძალიან ახლოს იყო ჩვენთან. ჩემი იდეები გავუზიარე დემეტრეს და ჩვენ ერთად დავიწყეთ ხელნაკეთი ნივთების შექმნა.იმის გამო, რომ ჩვენს ქვეყანს განსაკუთრებით უყვართ მუქი ფერები, გადავწყვიტეთ გაგვეფერადებინა მათი სამოსი ჩვენი აქსესუარებით.“
ახალგაზრდების შექმნილ ბიზნესს „Hippie” ჰქვია, რაც მშვიდობასთან, ყვავილებთან და სილამაზესთან ასოცირდება.
„როდესაც ჩვენი გვერდი შეიქნა, გადავწყვიტეთ ისეთი რაღაც ყოფილიყო ჩვენი ბრენდის სახელი რაც დაკავშირებული იქნობდა მშვიდობასთან, თავისუფლებასთან და რაც მთვარია ფერებთან.სწორედ ამის გამო შევარჩიეთ სახელი „ Hippie”. ადვილად დასამახსოვრებელია და მისი არსებობაც ყველამ იცის.“
ლალიმ და დემეტრემ საქმიანობა პატარა მინის ქილებით დაიწყეს, რომლებიც ფერადი ბრჭყვიალებით იყო სავსე. იმდენად დიდი გამოხმაურება და მოწონება მოჰყვა მათ შექმნილ პირველ ნამუშევრებს, რომ წყვილმა გადაწყვიტა კიდევ რაღაც განსხვავებული შეექმნა და გააკეთეს მინის გულსაკიდები, რომლშიც იქნებოდა სხვადასხვა მცენარე.
„ყველას შეუძლია თავისი საყვარელი ყვავილი, რომელიც გარკვეულ მოგონებასთნ ასოცირდებოდა გულით ატაროს. ყელსაბამებს სულ მალე მოჰყვა ჩანთები, რომლემაც განსაკუთრებული პოპულარობა და წარმატება მოგვიტანა.“
ახალგაზრდა წყვილის სახელოსნო მოხატული, ფერადი ავტობუსია, რომელიც ხელით მოხატეს. წყვილი ფერადი ავტობუსით ხშირად სტუმრობს სხვადასხვა გამოფენას, თბილისის ქუჩებს და საკუთარი ნივთებით ცდილობს გაუფერადოს მყიდველებს ცხოვრება.
„ვიყიდეთ ძველი ავტობუსი, ძალიან ძველი და დაზიანებული. გავაკეთეთ და ყოველი კუთხე მოვხატეთ. დავდივართ სხვადასხვა ღონისძიებასა და გამოფენაზე. ასევე ზაფხულში ვგეგმავთ, საქართველოს სხვადასხვა ქალაქს ვესტუმროთ ჩვენი ავტობუსით და გავყიდოთ ნივთები.“
წყვილს წარმატების მიღწევასა და საკუთარი ბიზნესის გაფართოებაში დიდი შრომა და ენთუზიაზმი ეხმარება. „პირველ რიგში არის ბევრი შრომა. რომლის გარეშეც არაფერი არ გამოდის. სამყარო სწრაფად ვითარდება და შენც არ უნდა ჩამორჩე ცხოვრების რიტმს. ასევე მთვარია ახალი და საინტერესო იდეები და მოთმინების დიდი უნარი. უნდა გავაცნობიერეოთ, რომ უცებ ვერ მივაღწევთ დიდ წარმატებას. „
ლალი და დემეტრე საკუთარი ბიზნესიდან შემოსული თანხით ხშირად ეხმარებიან ცხოველებს და მუდმივად ზრუნავენ მათი უფლებების დასაცავად.
„არ გვინდა ცხოველის საკუთრება და უფლება შეილახოს ადამიანის მოდისა და გემოვნებისთვის. ამიტომ ჩვენ მხოლოდ ტყავის შემცველ ჩანთებს ვამზადებთ და არც მომავალში ვაპირებთ, რომ ტყავის ჩანთები შევკეროთ, რადგან ბოლომდე დავიცავთ ცხოველების უფლებებს.
რაც შეეხება კონკურენციასა და ფასებს წყვილი ცდილობს ხელმისაწვდომ ფასად გაყიდოს საკუთარი პროდუქცია, იმისთვის რომ „Hippie” მხოლოდ ოცნების საგნად არ დარჩეს.
„კონკურენცია არის რა თქმა უნდა, თუმცა ვფიქრობთ, რომ ჩვენ ძალიან ბევრი უპირატესაობა გვაქვს. თუნდაც, ჩვენს მერე დაიწყეს ჩანთების შექმნა და მოხატვა, ჩვენ ვიყავით პირველები. ასევე ჩვენი პროდუქცია განსხვავდება ფასითაც. ვინარჩუნებთ დაბალ ფასებს სხვებთან შედარებით. რადგან გვინდა რომ ხელმისაწვდომი იყოს და ყველამ შეძლოს მისი შეძენა. ჩანთის ზომიდან გამომდინარე იცვლება ჩანთის ფასებიც. პატარა ჩანთები ღირს- 25-30 ლარი. საშუალო ზომის ჩანთები -55 ლარი. ზურგჩანთები – 65 ლარი. გვაქვს ასევე ბიჭის შედარებით დიდი ზომის ჩანთები რომელიც 85 ლარი ღირს. (სამოგზაურო). ასევე ხშირად გვაქვს ფასდაკლებებიც.“
„Hippie” -ის ნამუშევრები არა მარტო საქართველოში, არამედ ევროპის ბევრ ქვეყანაშიც იყიდება.
„უცხოეთის ქვეყნებშიც გადის ჩვენი ნივთები და ძირითადად ქართველი ემიგრენტები ყიდულობენ. ვაგზავნით საფრანგეთში, იტალიაში, გერმანიაში, საბერძნეთში, პორტუგალიასა და პოლონეტში. ჩვენს შესახები ფეისბუკ გვერდიდან იგებენ, გვიკავშირდება და ყიდულობენ.“
ახალგაზრდა წვილს სამომავლოდ დიდი გეგმები აქვთ, გაფართოებასა და მომავლში საკუთარი კაფეს გახსნასაც აპირებენ.
„ვგეგმავთ რომ გავფართოვდეთ, მეორე ფილიალი გავხსნათ ან არსებული გავაფართოვოთ.ძალიან გვინდა დეკორატიული ავეჯის გაკეთება, მცირე ზომის ავეჯი რომ მოვხატთ. ასევე გვინდა მოვხატოთ კერამიკის ჭურჭელი. მომავალში გვინდა, რომ გავაკეთოთ ხელნაკეთი ნივთები და კაფე. გვინდა განსხვავებული და ორიგინალური იყოს. ისეთი სხვას რომ არ გავდეს.“
მარიამ ლეკიაშვილი
