საქართველოს ევანგელურ-ლუთერული ეკლესიის სინოდის სხდომამ, რომელიც 19 ნოემბერს გაიმართა ახალი ეპისკოპოსი აირჩია. ჰანს იოაჰან კიდერლენი ლატვილემა მარკუს შოხიმ შეცვალა.
სხდომას სინოდის წევრების გარდა რელიგიის საკითხთა სახელმწიფო სააგენტოს თავმჯდომარე ზაზა ვაშაყმაძე, გერმანიის საელჩოს ატაშე ქრისტოფერ ფრონცეკი, ევანგელურ-ლუთერული ეკლესიის დელეგაცია გერმანიიდან, ასევე საქართველოს სომეხთა სამოციქულო მართმადიდებელი ეკლესიისა და ბაპტისტური ეკლესიის სასულიერო პირები ესწრებოდნენ. განხილულ იქნა 15 საკითხი მათ შორის ევანგელურ-ლუთერული ეკლესიის ეპისკოპოსობის ახალი კანდიდატის წარდგენა, განხილვა და არჩევა.
სინოდის სხდომის დასრულების შემდეგ ზაზა ვაშაყმაძე შეკრებილ საზოგადოებას მიულოცა ეპისკოპოსის არჩევა, წარმატება უსურვა მას ამ მნიშვნელოვან თანამდებობაზე, გამოთქვა სურვილი ევანგელურ–ლუთერულ ეკლესიასთან მჭიდრო თანამშრომლობის ტრადიციის გაგრძელების შესახებ და მადლობა გადაუხადა ჰანს იოაჰან კიდერლენს წლების განმავლობაში საქართველოს ევანგელურ–ლუთერული ეკლესიის ხელმძღვანელობისათვის. სააგენტოს თავმჯდომარემ ასევე აღნიშნა, რომ მზადაა გამართოს სამუშაო შეხვედრები, გერმანიის საელჩოსა და ევანგელურ-ლუთერულ ეკლესიასთან, საქართველოში გერმანელთა დამკვიდრების 200 წლისთავისათვის დაგეგმილ ღონისძიებასთან დაკავშირებით.
შეგახსენებთ, რომ საქართველოს ევანგელურ–ლუთერულ ეკლესიას 2009 წლიდან ეპისკოპოსი ჰანს იოახიმ კიდერლენი ედგა სათავეში. მანამდე, მან საკმაოდ ხანგრძლივი და წარმატებული კარიერა განვლო, როგორც იურისტმა, დიპლომატმა და თეოლოგმა.
„გული მწყდება, რომ ბევრი რამ ვერ და არ განხორციელდა. როგორც იურისტმა შემოვიღე სხვადასხვა წესები და ძალიან გაოცებული დავრჩი, როცა აღმოვაჩინე, რომ არსებობს წესები, მაგრამ რეალურად მას არავინ იცავს. ვერ ვიტყვი, რაიმე ძალიან დიდი და ფართომასშტაბიანი გავაკეთე, მაგრამ უბრალოდ ვმართავდი და ვეხმარებოდი იმ პრობლემების გადაწყვეტაში, რაც იმდროისათვის არსებობდა ჩვენს ეკლესიაში. ლუთერული ეკლესია არის პატარა ეკლესია ბაქოდან სოხუმამდე, სულ სადღაც 700 წევრს ითვლის და ჩვენი მისიაა გავაქართულოთ ის, რადგანაც უმეტესობა ვისაც გერმანელი წინაპრები ჰყავდა გერმანიაში გაემგზავრნენ ოპერ-მუშაკად, სასწავლებლად და აღარ დაბრუნებულა უკან. ვფიქრობ, ჩვენს ეკლესიას აქვს დიდი მისია–საქართველოს გააცნოს ევროპა. იმის თქმა, რომ ევროპაში არ არის მორალი, ეთიკა, რომ იქ ქრისტიანული ღირებულებები არ არსებობს არასწორია, რადგან მთელი ევროპის კანონმდებლობა დაფუძნებულია ქრისტიანულ ღირებულებებსა და ეთიკაზე. ქართველებმა ბევრი უნდა გაიგონ ევროპის შესახებ. ლუთერანული მრწამსი ყოველთვის იყო დაფუძნებული განათლებაზე და ვფიქრობ, ჩვენ შეგვიძლია ვითამაშოთ მნიშვნელოვანი როლი საქართველოს ევროპასთან დაახლოვებაში, “- ასე შეაფასა ეპისკოპომა ჰანს იოახიმ კიდერლენმა საქართველოში მოღვაწეობა რამდენიმე თვის წინ „თბილისი თაიმსისთვის“ მიცემულ ინტერვიუში.
ინტევიუ სრულად შეგიძლიათ იხილოთ: www.ttimes.ge/archives/66964
სოფიკო ნინიკაშვილი