„ოჯახში ძალადობის ფაქტების აღსაკვეთად შარშან სამი ათასამდე შემაკავებელი ორდერი გამოიცა. ჩვენი თავშესაფრით 192–მა ადამიანმა ისარგებლა, წელს უკვე 236 მსხვერპლი გვყავს. რეალობა გაცილებით უფრო მეტია, რადგან მომართვიანობის კულტურა ჯერ კიდევ არ არის მაღალი“. ოჯახში ძალადობის მსხვერპლთა თავშესაფრის პირობებზე და გენდერული ნიშნით დისკრიმინაციის სტატისტიკაზე ტრეფიკინგის სახელმწიფო ფონდის დირექტორმა თამარ ბარკალაიამ ტელეკომპანია „იმედზე“, გადაცემა „დღის შოუს“ეთერში ისაუბრა.
„საქართველოს მასშტაბით ხუთი თავშესაფარია, სადაც 24 საათაინი სერვისი მოქმედებს. აქ ქალბატონები უსაფრთხო, რისკისგან აბსოლუტურად განრიდებულ სიტუაციასთან ერთად უსასყიდლოდ იღებენ იურიდიულ კონსულტაციებს სასამართლო პროცესებისთვის, ფსიქოსოციალური რეაბილიტაციისთვის ფსიქოლოგის მომსახურებას და სოციალური მუშაკის დახმარებას. 116 006 არის საკონსულტაციო ცხელი ხაზი, სადაც შეუძლია დარეკოს ძალადობის მსხვერპლმა, ჩვენ მათ დავეხმარებით სტატუსის მოპოვებაში და შემდეგ თავად განერიდება მოძალადეს. შარშანდელთან შედარებით სტატისტიკა 35 %–ით არის მომატებული. თავშესაფარის მსურველთა 99 % არის ქალი. ამ მხრივ საქართველო არ არის გამონაკლისი, მსგავსი სიტუაციაა მსოფლიოს მასშტაბით.
ძირითადად არიან ქალები, რომლებიც მეუღლეების მხრიდან არიან ძალადობის მსხვერპლნი და როგორც წესი ბავშვებთან ერთად მოდიან. იშვიათია, როდესაც ქალი პირველივე ინციდენტზე ითხოვს დახმარებას და რეკავს ცხელ ხაზზე. ხშირ შემთხვევაში ძალადობა წლების მანძილზე გრძელდებოდა და ქალი გვიან მოგვმართავს. მხოლოდ და მხოლოდ გამოუვალ მდგომარეობაში იღებენ დარეკვის გადაწყვეტილებას. წელს თავშესაფარში არის 5 ძალადობის მსხვერპლი ბავშვი. ბავშვების შემთხვევაში ძირითადად ახლობლები რეკავენ. ისინი უმეტესად ფიზიკური ძალადობის მსხვერპლნი არიან. დედები როგორც წესი ისინი მოდიან ბავშვებთან ერთად. ჩვენი სერვისები ბავშვებზეც არის მორგებული. გვყავს ძიძა, რომელიც მუშაობს მათთან, გვყავს ასევე ბავშვთა ფსიქოლოგი და ხდება მათი რეგისტრაცია სკოლაში. გვყოლია ტრანსგენდერი ძალადობის მსხვერპლებიც.
გენდერული ნიშნით და ქალთა მიმართ ძალადობის საწინააღდეგო კამპანია 16 დღის განმავლობაში გაგრძელდება, სახელმწიფო ფონდს თბილისსა და სხვა მსხვილ ქალაქებში ბევრი ქუჩის აქციაც აქვს დაგეგმილი. მთელი წლის განმავლობაში გვქონდა შეხვედრები სკოლებში და უნივერსიტეტებში.პირველ რიგში ახალგაზრდა თაობას უნდა ჩამოვუყალიბოთ შეხედულება, რომ ნებისმიერი ფორმის ძალადობა მიუღებელია,“–განაცხადა თამარ ბარკალაიამ.
მანანა ღოღობერიძე
