„ეს არის ერთჯერადი სოციალური დახმარების აქცია, რომელსაც ჩვენ სახელმწიფო ბიუჯეტიდან განვახორციელებთ. 2017 წლის 1 იანვრიდან ასი ათას ლარს ქვემოთ სესხები ფიზიკურ პირებზე გაიცემა მხოლოდ ლარში“. უცხოურ ვალუტაში გაცემული კრედიტების ლარიზაციის ინიციატივის შესახებ ფინანსთა მინისტრმა დიმიტრი ქუმსიშვილმა ტელეკომპანია „იმედზე“, გადაცემა „ქრონიკის“ ეთერში ისაუბრა.
„ჩემი სესხები პრაქტიკულად დაფარული მაქვს, თუმცა მგონია, რომ კონკრეტულ პიროვნებაზე ამის განხილვა არ იქნება სწორი. მე ვისარგებლებდი ამ შემოთავაზებით, აბსოლიტურად გულწრფელად ვამბობ. ეს არ არის ჩვენი გამოგონება, თუმცა ეს ნამდვილად არის პრობლემის მოგვარების გზა, საუკეთესო გამოცდილებიდან გამომდინარე მივიღეთ ეს გადაწყვეტილება. ჩვენ უნდა ვიზრუნოთ მოსახლეობის დიდ ნაწილზე. ამიტომ მივიღეთ გადაწყვეტილება და მსესხებლებს კომერციული ბანკების დახმარებით, 2015 წლის 1 იანვრამდე უცხოურ ვალუტაში გაცემული სესხების ლარში გადაყვანას შევთავაზებთ. გადახურდავების კურსი იქნება შეღავათიანი, ჩვენ ამის ხარჯი შემდეგი წლის ბიუჯეტში ჩავდეთ. კონვერტაციის ტვირთი არ აწვებათ ბანკებს. ჩვენ ნელ–ნელა სრულად ამოვწურავთ იმ სესხების რაოდენობას, რომლებიც გაცემულია 2015 წლის 1 იანვრამდე და თანდათან ეს სესხები დაიფარება.
ახალი სესხები უცხოურ ვალუტაში იქნება ნაკლები, შესაბამისად სოციალური წნეხიც იქნება ნაკლები. ჯამურად ეს გადაწყვეტილება ეხება 33 ათას მსესხებელს და ოთხას მილიონ დოლარს, რის გალარებასაც ვთავაზობთ მოსახლეობას. ლარის მიწოდებას განახორციელებს ეროვნული ბანკი. ეს არის ნებაყოფლობითი, თუ ადამიანს არ უნდა სესხის გალარება, არავის ვაძალებთ. პირიქით ვამბობთ, რომ ეს არის ხარჯი, რომელსაც სახელმწიფო გაიღებს. ბანკებისთვისაც ასევე მნიშვნელოვანია, რომ კლიენტებს ჰქონდეთ შესაძლებლობა მოემსახურონ სესხებს. არც ერთ ბანკს არ სიამოვნებს, როდესაც კლიენტი ვერ ემსახურება სესხებს და უწევთ გირაოს გაყიდვა“.
ფინანსთა მინისტრმა ონლაინ–სესხების უარყოფით მხარეებზეც ისაუბრა.
„არ მინდა დავაბნიო ჩვენი მოსახლეობა. ბიზნეს–მოდელი, რომელიც ჩვენთან აქვს ონლაინ–სესხებს, არ ქმნის დამატებით ღირებულებას ქვეყნის ეკონომიკაში, ან ქმნის ძალიან მცირე დამატებით ღირებულებას და პარალელურად მოსახლეობის სიდუხჭირის დიდ რისკს. პაკეტი, რომელიც შემოვა ჯერ საქართველოს მთავრობაში და შემდეგ სავარაუდოდ პარლამენტში, მომხმარებელთა უფლებების დაცვას მოემსახურება“.
მანანა ღოღობერიძე