„მოსახლეობას ვთავაზობთ უფასო გამოკვლევებს აივ ინფექცია შიდსზე და C ჰეპატიტზე. მობილური ამბულატორიები გლობალური ფონდის მიერ იქნა შეძენილი, რომლებიც ძირითადად რისკის ჯგუფების გამოსავლენად გამოიყენება.თუმცა კვირეულის ფარგლებში ამ უფასო ტესტირების შემოთავაზებით შეუძლია ისარგებლოს ნებისმიერმა მოქალაქემ.“. აივ ინფექცია შიდსის წინააღმდეგ ბრძოლის კვირეულის ფარგლებში დაგეგმილი ღონისძიებების შესახებ გლობალური ფონდის შიდსის პროგრამის მენეჯერმა ქეთი სტვილიამ „რუსთავი 2“–ზე, გადაცემა „დილა მშვიდობისა საქართველოს“ ეთერში ისაუბრა.
„ამ დღის აღნიშვნაში ყოველწლიურად 160–ზე მეტი ქვეყანა მონაწილეობს და საქართველო ტრადიციულად არის მათ შორის. დაგეგმილია მთელი რიგი ღონისძიებები, რომლებიც ჩვენ კვირეულის ფარგლებში გავშალეთ. ძირითადი აქცენტი გადავიტანეთ ტესტირებებზე. ერთადერთი გამოსავალი არის გამოკვლევების დროულად ჩატარება. რამდენიმე წელია მოსახლეობას ვაწვდით ინფორმაციას, რომ არსებობს მაღალეფექტური მკურნალობა, რომლის საშუალებითაც ადამიანი თავს აბსოლიტურად ჯანმრთელად გრძნობს.
შიდსი წლების განმავლობაში ითვლებოდა სასიკვდილო დაავადებად, სამწუხაროდ სწორედ ამან შექმნა სტიგმა, რომელიც არსებობს ამ დაავადების ირგვლივ. სტიგმამ საკმაოდ მყარად გაიდგა ფესვები საზოგადოებაში და რთული აღმოჩნდა მასთან ბრძოლა. ხშირად არის არაჯანსაღი აჟიოტაჟი ამ დაავადების ირგვლივ, რაც კიდევ უფრო აღრმავებს სტიგმას. 6000–ზე მეტი ადამიანი უკვე რეგისტრირებულია, თუმცა სავარაუდოდ დაავადების რიცხვი დაახლეობით ათი ათასამდეა. დაახლეობით ოთხი ათასი ადამიანი ცხოვრობს ამ ინფექციით და არ მიდის გამოსაკვლევად. პაციენტის უფლებების კანონი იცავს ნებისმიერი ავადმყოფის პირად ინფორმაციას, ეს განსაკუთრებით აივ ინფექცია შიდსს ეხება. დიაგნოზის გამჟღავნება მხოლოდ ავადმყოფის ნებით უნდა მოხდეს“.
მანანა ღოღობერიძე
