იმის მიუხედავდ, რომ დედაქალაქში ბევრი სახის საზოგადოებრივი ტრანსპორტი ფუნქციონირებს, ადგილების პრობლემა მაინც ერთ-ერთ გადაუჭრელ საკითხად რჩება.
ამ მხრივ, გამონაკლისი არც სამარშუტო ტაქსებია. ხშირ შემთხვევაში, მძღოლები გადატვირთულ მიკროავტობუსს მაინც აჩერებენ, ფეხზე მდგომ მგზავრებს კი, ხშირად დიდი მანძილის გავლა უწევთ.
აღნიშნულ პრობლემაზე კომპანია „თბილისი მიკროავტობუსმა“ სპეციალური განცხადება გაავრცელა, სადაც მგზავრებს მოუწოდებდნენ, რომ მიკროავტობუსში არ ავიდნენ ფეხზე 5 ადამიანი მაინც თუ იდგა, მძღოლებს კი აფრთხილებდნენ, რომ ტრანსპორტი ფეხზე მდგომი მგზავრებით არ გადატვირთონ.
იმის გასარკვევად, თუ რა ღონისძიებები გატარდა განცხადების გავრცელების შემდეგ, „თბილისი თაიმსი“ კომპანია „თბილისი მიკროავტობუსს“ დაუკავშირდა:
კომპანია „თბილისი მიკროავტობუსის“ საზოგადოებასთან ურთიერთობის სამსახურის სპეციალისტი, ელენე ხაჭაპურიძე: „დიახ, ჩვენ განცხადება გავავრცელეთ, სადაც მძღოლებს კიდევ ერთხელ მოვუწოდებთ, რომ მიკროავტობუსი მგზავრებით არ გადატვირთონ. მათ შევახსენებთ, რომ მხოლოდ ხუთი ადამიანის ფეხზე დაყენების უფლება აქვთ, რათა უსაფრთხოების ზომები დაცული იყოს.
ყველა იმ მძღოლის მიმართ, რომლებიც სამარშუტო ტაქსში ზედმეტი მგზავრის აყვანას დაუშვებს, კომპანიის მონიტორინგის სამსახურის მიერ, მკაცრი ადმინისტრაციული ზომები გატარდება.
ბოლო 1 კვირის მაჩვენებლებით, მონიტორინგის სამსახურმა სანქცია 8 დამრღვევ მძღოლზე გაატარა.
კომპანია თხოვნით მოსახლეობასაც მიმართავს, რომ გადატვირთულ მიკროავტობუსში ასვლისგან თავი მაქსიმალურად შეიკავონ – განაცხადა „თბილისი მიკროავტობუსის“ საზოგადოებასთან ურთიერთობის სამსახურის სპეციალისტმა.
ნინო ზარიძე
