სპორტისა და ახალგაზრდობის საქმეთა სამინისტროსა და ფეხბურთის ფედერაციის მხარდაჭერით 2-4 დეკემბერს თბილისში, ზაზა ბენდელიანის სახელობის სტადიონზე „მინი ფეხბურთის ფესტივალი“ ჩატარდება. გუნდები 11-14 წლის დევნილი ახალგაზრდებით და მცირე საოჯახო ტიპის აღსაზრდელებითაა დაკომპლექტებული. შეჯიბრში მონაწილეობის მისაღებად თბილისსა და რეგიონებში 8 გუნდი შეირჩა, სულ 64 მონაწილე.
პროგრამა სპორტისა და ახალგაზრდობის საქმეთა სამინისტროს ახალგაზრდობის პოლიტიკის მართვის დეპარტამენტის ,,მზრუნველობამოკლებული და სოციალურად დაუცველი ბავშვებისა და ახალგაზრდების მხარდაჭერის“ პროექტის ფარგლებში ხორციელდება. პროგრამა მიზნად ისახავს ჯანსაღი ცხოვრების პოპულარიზაციას, მზრუნველობამოკლებული ახალგაზრდების სააზოგადოებაში ინტეგრაციას, ნიჭიერი და პერსპექტიული მოზარდების გამოვლენას. მსგავს პროგრამებს სამინისტრო სამი წელია ახორციელებს.
მიმდინარე სწავლებას ააიპ ,,ახალგაზრდული მოძრაობა ჯანსაღი და ნათელი მომავლისთვის“ უძღვებოდა. ფეხბურთის სწავლება მიმდინარეობდა ფრეზეთში, ფოთში, ქუთაისსა და გორში მცხოვრები ახალგაზრდებისთვის. სწორედ მათგან შეირჩა ფინალისტები.
ფინალურ ღონისძიებაზე ფესტივალის მონაწილე ახალგაზრდები სპორტული ეკიპირებითა და ბურთებით დაჯილდოვდებიან. გამარჯვებულ გუნდებს გადაეცემათ თასები, მედლები, სიგელები და ფულადი პრიზები.
