„მიტარბი არის კურორტი რომელიც საბჭოთა კავშირის შემდეგ არ ყოფილა, ეს კურორტი აღდგა და ქვეყნის წინსვლის თვალსაჩინო მაგალითია, ის დავკარგეთ და ახლიდან შევიძინეთ. დაახლეობით 50 მილიონი ლარი დახარჯა სახელმწიფომ კოხტა–მიტარბის ტერიტორიაზე. ინფრასტრუქტურის სამინისტრო იწყებს ასევე სოფელ მიტარბის წყლის რეაბილიტაციას“. მთის კურორტებზე მიმდინარე და მომავალში დაგეგმილი პროექტების შესახებ მთის კურორტების განვითარების კომპანიის ხელმძღვანელმა სანდრო ონოფრიშვილმა „რუსთავი 2“–ზე, გადაცემა „დილა მშვიდობისა საქართველოს“ ეთერში ისაუბრა.
„კურორტი გოდერძი 10 დეკემბერს გაიხსნება. იმედი გვაქვს, რომ გუდაურსაც 10 დეკემბერს გავხსნით.24 დეკემბერს იხსნება თეთნულდის კურორტი, 25–ში კი მიტარბი. წელს იყო უპრეცედენტო რაოდენობის საბაგიროების მშენებლობა. დამონტაჟდა ცხრა საბაგირო, მათი მშენებლობის ბოლო ფაზაზე ვართ გადასული. ამ თვეში ყველა საბაგირო დასრულდება, დაემატა სათხილამურო ტრასები. გვაქვს მასტერ პლანი, სამოქმედო გეგმა, თუ კონკრეტულად რა პროექტები უნდა განხორციელდეს გუდაურში, ამ გეგმის მიხედვით ინვესტორებს გუდაურში ფულის დაბანდება გაუადვილდებათ.
მოსახლეობისთვის სასიხარულო ამბავია ის, რომ გუდაურში არ იქნება ქაოტური მშენებლობა. ინფრასტრუქტურის სამინისტრომ განახორციელა მთლიანად გუდაურის წყლის რეაბილიტაციის უპრეცედენტო პროექტი. ეს გუდაურის დაარსების შემდეგ არ მომხდარა. 2018 ში დაგეგმილია კანალიზაციის სისტემის მოწყობა, ეს ნიშნავს რომ უახლოეს 30 წელიწადში გუდაურს წყლის პრობლემა არ ექნება. მით უმეტეს, რომ ბოლო ორი წელია გუდაურიც და ბაკურიანიც ვიზიტორების რაოდენობის მხრივ რეკორდს ხსნის. წლევანდელი ჯავშნებიც გვაძლევს იმის თქმის საფუძველს, რომ არანაკლებ საინტერესო სეზონი გველოდება.
კურორტ გოდერძიზე გვაქვს სიახლე. აჭარის მთავრობის აქტიურობით კერძო კომპანიამ დაიწყო 100–ნომრიანი სასტუმროს მშენებლობა, რომელიც 2017 წელს დასრულდება. ეს იქნება პირველი დიდი სასტუმრო კურორტ გოდერძიზე. გაზაფხულზე იწყება კურორტამდე მისასვლელი გზის მშენებლობაც, რაც კიდევ უფრო გაზრდის ვიზიტორების რაოდენობას. იქ ჩასვლა თბილისიდან 3 საათში იქნება შესაძლებელი,“–განაცხადა სანდრო ონოფრიშვილმა.
მანანა ღოღობერიძე