„აღმოჩნდა, რომ ევროპაში დაშვებულ ნორმებთან შედარებით საქართველოში შემოტანილი ბავშვის სათამაშოები 30–ჯერ, 40–ჯერ და 100–ჯერ მეტად სახიფათოა. ეს არის 5–დან 20 ლარამდე სათამაშოები. ჩვენ უკვე ვაცნობეთ მაღაზიებს და თუ მათი ნება იქნება შეუძლიათ ამოიღონ გაყიდვიდან, თუმცა კანონით არ არის აკრძალული“. ამის შესახებ საქართველოს სტრატეგიული კვლევების ცენტრის წარმომადგენელმა ლია თოდუამ ტელეკომპანია „იმედზე“, გადაცემა „დღის შოუს“ ეთერში ისაუბრა.
„ევროკავშირის ქვეყნები მავნე სათამაშოებს სპეციალურ ვებ–გვერდზე აქვეყნებენ. იქ იყო დაახლეობით ისეთი სათამაშოები, რომლებიც საქართველოში ხშირად არის მოთხოვნადი. საქართველოში აკრედიტირებული ლაბორატორია არ გვაქვს, ამიტომ სათამაშოები ორი პარამეტრის შესამოწმებლად გერმანიაში გავგზავნეთ. ინფორმაცია სახელისუფლებო ორგანოებსაც მივაწოდეთ, საბაჟოდან უკვე მივიღეთ პასუხი, რომ უძლურები არიან. ეკონომიკის სამინისტროდან პასუხს ველოდებით, ომბუდსმენმა კი გვიპასუხა,რომ შესაძლოა დაგვეხმაროს. ნიშანი CE ნიშნავს, რომ შეესაბამება ევროპულ სტანდარტს, თუმცა აღმოჩნდა, რომ ტყუილია და არ შეესაბამება“.
სათამაშოების შემცველი მავნე ნივთიერებების შესახებ ტოქსიკოლოგმა, ჰიგიენისტმა, მარინა გიორგობიანმაც ისაუბრა.
„ეს არ არის ახალი პრობლემა, გასული საუკუნის 50–იანი წლებიდან გამოჩნდა ისეთი ნივთიერებები, რომლებიც მეტ–ნაკლები შემადგენლობით ყველა რეზინის, პლასტმასის, შესაფუთი მასალის შემადგენლობაში შედის. ამ ჯგუფის ნივთთიერებები პლასტმასებს სირბილეს და სიმსუბუქეს აძლევს. 3 წლის ასაკამდე ბავშვებისათვის სათამამაშოებში საერთოდ არ არის რეკომენდირებული და აკრძალულია. ევროკავშირში უკვე ბოლო დროს ამ ნივთიერებების საერთოდ ამოღებაზე საუბრობენ. სამწუხაროდ ეს ჯგუფი ტოქსიკოლოზებისთვის ცნობილია, როგორც ტესტოსტერონის დამაქვეითებელი და მამაკაცებისთვის შვილოსნობის ასაკისთვის დამღუპველი. ქალებისთვის ორსულობის პერიოდში იწვევს დარღვევებს, სიმსუქნეს, დიაბეტს, ჰორმონალურ დარღვევებს და ავთვისებიან სიმსივნესაც. ყველა სათამაშო რმელიც რბილია არ არის საშიში, თუმცა ჩვენს ქვეყანაში არ გვაქვს ბარიერი, სტრუქტურა, რომელიც შემოტანილ პროდუქციას გააკონტროლებდა“.
მანანა ღოღობერიძე
