“მოვლენების წინ გასწრება არ მიყვარს, თუმცა შესაძლებელია ერთმანეთს მივულოცოთ ნაბიჯი წინ . არ ველოდები არანაირ სიურპრიზებს. მოიხსნა ბარიერი, რომელსაც ქვია შეჩერების მექანიზმი. თუნდაც თეორიულ ბარიერს გამოვრიცხავ”. ვიზალიბერალიზაციის პროცესის შესახებ ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ვიქტორ დოლიძემ ტელეკომპანია “იმედზე”, გადაცემა “ღია ეთერში” ისაუბრა.
“მომავალი კვირის სამთა შეხვედრა ევროკავშირის საბჭოს, ევროკომისიასა და პარლამენტს შორის პრაქტიკულად ფორმალური ხასიათისაა. განიხილება მხოლოდ ის, როდის ჩაჯდება ჩვენი საკითხი დღის წესრიგში, რომ კენჭი უყარონ. საბოლოო ვერდიქტს ევროპარლამენტი გამოიტანს. ალბათ ერთეულები იქნებიან, რომლებიც ხმას არ მისცემენ, უდიდესი უმრავლესობა მხარს გვიჭერს. პრეზიდენტ შულცისგანაც მიღებული გვაქვს გარანტიები პარლამენტის მხარდაჭერის შესახებ.
შესაძლებელი იყო ევროკავშირის სანდოობა დამდგარიყო, ბუნებრივია რუსული პროპაგანდა ჩვენს ქვეყანაში მაინც მუშაობს. შესაბამისად პრემიერ-მინისტრმა თავისი ვიზიტისას ყველაფერი გააკეთა ეფექტური კომუნიკაციების მისაღწევად, ჩვენი პოზიციები პრინციპულად დაფიქსირდა. ისევე როგორც საქართველოს სჭირდება ევროპა, ევროპული განათლება, ისინი უნდა დარწმუნდნენ, რომ მათი სტრატეგიული ინტერესები ამ რეგიონში დევს. უსაფრთხოების საკითხებთან დაკავშირებითაც კი საქართველო არის სანდო პარტნიორი. ეს ვიზალიბერალიზაცია არის გაწვდილი ხელი, მაგრამ არ არის დასასრული, ამით ურთიერთობის ახალი ეტაპი იწყება”.
მანანა ღოღობერიძე
