„კარგია, რომ ყინული დაიძრა. გასული წლების განმავლობაში ეს სფერო იყო ყველასგან მივიწყებული. ტექნიკური დათვალიერება ხშირად იდგა დღის წესრიგში თუმცა მთავრობა ვერასდროს ბედავდა ამ რეფორმის განხორციელებას“. სამთავრობო ინიციატივასთან დაკავშირებით ავტოიმპორტიორთა კავშირის ხელმძღვანელმა მიხეილ ალხანიშვილმა ტელეკომპანია „მაესტროზე“, გადაცემა „ბიზნეს კონტაქტის“ ეთერში ისაუბრა.
„წლების განმავლობაში ძალიან მძიმე მდგომარეობაში აღმოვჩნდით მოძრაობის უსაფრთხოების მხრივ. ეკოლოგიის კუთხით იყო სავალალო მდგომარეობა. ჯერჯერობით ეს არის საგადასახადო კუთხით დარეგულირება, იმედი გვაქვს სხვა რეგულაციებიც მოყვება. საქართველოდან რეექსპორტი გარკვეული წლების განმავლობაში კარგად მუშაობდა, მაგრამ ვერასდროს იქნებოდა გრძელვადიანი მომგებიანი ბიზნესი. ამ სფეროს ყველა ქვეყანა არეგულირებს, ყველამ აწია გადასახადი და ცდილობენ მეორადი ავტომობილების შესვლა შეზღუდონ. ნელ–ნელა ჩამოშორდა ეს ბაზრები ექსპორტიორებს.
ცვლილებები სხვადასხვა კუთხით შეიძლება განხორციელდეს. ერთი საკითხია აქციზით და გადასახადებით იმპორტის რეგულირება. ამით სახელმწიფოს შეუძლია თავისი პოლიტიკა გაატაროს, პრიორიტეტი მიანიჭოს ახალ, ნაკლებ გამონაბოლქვიან ან გამართულ ავტომობილებს. მნიშვნელოვანია ასევე ტექნიკური დათვალიერება, გზაზე ვარგისობის შემოწმება, ტესტირება და ასევე გამონაბოლქვის ნორმები. მე ვემხრობი მარეგულირებელი ნორმების ეტაპობრივ შემოღებას.
ძნელია ბაზარზე ფასების პროგნოზირება. არ ვიცით ცვლილებებისაბოლოო განხილვის შემდეგ რა სახეს მიიღებს. ახალ ავტომობილებზე ფასები არ უნდა გაიზარდოს. რაც შეეხება მეორად ავტომობილებს, ყველა ქვეყანაში ეს ან აკრძალულია, ან ახალი გადასახადების განაკვეთით რეგულირდება და შეყვანის შეზღუდვა ხდება. ჩვენ რაიმე ახალს და განსაკუთრებულს არ ვაკეთებთ, ეს ბევრად ადრეც უნდა მომხდარიყო,“–განაცხადა მიხეილ ალხანიშვილმა.
მანანა ღოღობერიძე
