როგორც ცნობილია, 2016 წლიდან მასშტაბური პროექტი „Check in Georgia” დაიწყო. პროექტის მიზანი ჩვენი ქვეყნის კულტურულ ცენტრად ქცევა და ტურისტების მოზიდვა გახლდათ. ამავე წელს, საქართველოში ყველაზე დიდი საკონცერტო დარბაზი, „ბლექ სი არენა“ აშენდა, რამაც უკვე უამრავ ქართველ თუ უცხოელ ვარსკვლავს უმასპინძლა. როგორც ორგანიზატორების მხრიდან დასაწყისში ითქვა, პროექტი ერთჯერადი სახის არ უნდა იყოს და ყოველ წელს სხვადასხვა სიახლეებს შემოგვთავაზებენ.
პროექტის გეგმებზე და სიახლეებზე „თბილისი თაიმსს“ Black Sea Arena-ს დირექტორი, დიმიტრი ბერიძე ესაუბრა.
დიმიტრი ბერიძე: „გასულ წელს პროექტი „Check-in Georgia“ კულტურის სამინისტრომ ჩაატარა და დააფინანსა, მომავალ წელს პროექტის განხორციელებას ტურიზმის ადმინისტარცია გეგმავს. რაც შეგვეხება პირადად ჩვენ, „ბლექ სი არენას“ სცენაზე, 20 მაისს, ლეგენდარული ამერიკული როკ-ჯგუფის, „აეროსმიტის“ კონცერტის ჩატარება იგეგმება. ჯგუფის ჩამოყვანა 1.5 მილიონი დოლარი ჯდება.
სხვა კონცერტები ჯერ-ჯერობით დაგეგმილი არაა, უბრალოდ შემიძლია ვთქვა, რომ კონცერტები როგორც უცხოელი, ასევე ადგილობრივი არტისტების მონაწილეობით ჩატარდება. რაც შეეხება გასულ წელს, ჩვენ 45000 ვიზიტორი გვყავდა და ვთვლით, რომ არენის პირველმა სეზონმა წარმატებულად ჩაიარა.
მსგავსი ღონისძიებების ჩატარება ძალიან კარგია, იგი როგორც ტურიზმის განვითარებას, ასევე ადგილობრივების დასაქმებასაც უწყობს ხელს. „ბლექ სი არენა“ მომავალ წელს ტურისტების გაორმაგებულ რაოდენობას ელის.”
ნინო ზარიძე
