„სისტემის მიმართ უნდობლობის კრიტიკული ზღვარი გადავლახეთ, პრობაციის, ჯანდაცვის, პენიტენციური სისტემის კუთხით მნიშვნელოვანი რეფორმები გავატარეთ. კანონში 40–მდე ცვლილება შევიდა“. სისტემაში გატარებულ რეფორმებზე და არსებულ პრობლემებზე სასჯელაღსრულებისა და პრობაციის მინისტრმა კახი კახიშვილმა ტელეკომპანია „იმედზე“, გადაცემა „ღია ეთერში“ ისაუბრა.
„ახალ წელს გვაქვს ამბიციური გეგმები, ინიცირებულია ცვლილებების პაკეტი, რომლის მიხედვითაც უფლებრივი მდგომარეობა კიდევ უფრო გაუმჯობესდება. სისტემურად შეიცვლება პატიმრობის საკითხი. სისხლის სამართლის საპროცესო კოდექსის მიხედვით ეს არის უკიდურესი ფორმის სანქცია და სასჯელი, მეორე ფორმა არის გირაო. საქართველოს მთავრობაში შეიქმნა სამუშაო ჯგუფი, სადაც განვიხილავთ ახალი ტიპის აღმკვეთი ღონისძიების სახეს, ეს არის შინა პატიმრობა.
ამ სისტემაში გამოწვევები მუდმივად იქნება, ეს სისტემა მუდმივად საჭიროებს განვითარებას, პროგრესის შეტანას. იყო დრო, როდესაც ამ სისტემას მართავდნენ კრიმინალური ავტორიტეტები, კანონიერი ქურდები. შემდეგ მოვიდა დრო, როდესაც გათელილი იყო ადამიანის უფლებები. ამიტომ საჭირო იყო ისეთი რეფორმა, რომელიც პირველ რიგში უზრუნველყოფდა ადამიანის უფლებების , მათ შორის თანამშრომლების უფლებების დაცვას. მინისტრის ხასიათზე კი არ უნდა იყოს მორგებული სისტემა, არამედ მინისტრი და ხელმძღვანელი პირები უნდა მოერგონ იმ საკანონმდებლო რეგულაციებს, რომლებიც მოქმედებს და იცავს ადამიანის უფლებებს.
მავნე პრაქტიკა უკვე გამოვრიცხეთ. სადაც შესაძლებელია, რომ პატიმარს მიაყენონ შეურაცხყოფა, დავაყენეთ ვიდეო მონიტორინგი. ადრე იყო პრაქტიკა, რომ ეს ტექნიკა მასალის შენახვას 24საათზე მეტ ხანს ვერ ახერხებდა. ჩვენ გავზარდეთ ეს დრო და დაახლოებით 5 დღემდე გვაქვს საშუალება, რომ მასალა დავაარქივოთ. კონკრეტულად იმ პატიმრების გამო, რომლებიც ცდილობენ თავი მსხვერპლად გამოიყვანონ. მნიშვნელოვანია სისტემის გამჭვირვალობა.
სახალხო დამცველის აპარატის ნებისმიერ წარმომადგენელს შეუძლია ნებისმიერ დროს შევიდეს დაწესებულებაში და გაესაუბროს ნებისმიერ პატიმარს. ამოქმედდა რევოლუციური ცვლილება, სახალხო დამცველის წარმომადგენელს დაწესებულებაში ფოტოგრაფირების უფლება აქვს, არაფერი არსად არ იმალება.
კრიმინალური სუბკულტურა ციხეებში რომ არ არსებობდეს, წარმოუდგენელია. ეს ნებისმიერ ციხეში არსებობს, მთავარია ისე მოახდინო ფილტრაცია და მენეჯმენტი, რომ ეს მასშტაბურად ყველაზე არ გავრცელდეს. არსებობენ პატიმრები, რომლებმაც ჩაიდინეს დანაშაული და უბრალოდ უნდათ მოიხადონ სასჯელი. ადრე დანაშაულის სიმძიმეზე იყო დამოკიდებული რომელ საპატიმრო დაწესებულებაში მოიხდიდა დამნაშავე სასჯელს. ეს იყო არასწორი, შესაძლებელია ადამიანმა ჩაიდინოს განსაკუთრებით მძიმე დანაშაული, მაგრამ თავისი არსით არ იყოს კრიმინალური სუბკულტურის მატარებელი. ასევე შეიძლება ადამიანმა ჩაიდინოს ნაკლებად მძიმე კატეგორიის დანაშაული და იყოს კრიმინალური სუბკულტურის. ჩვენ ევროპელ და ამერიკელ პარტნიორებთან ერთად შევიმუშავეთ სპეციალური პროგრამა, რისკების შესაფასებლად.
წინა წლის იანვარში გავხსენით განსაკუთრებული რისკის დაწესებულება, სადაც ხვდებიან ის ადამიანები, რომლებსაც დაუდგინდათ მაღალი რისკი. მნიშვნელოვანია, რომ მულტიდისციპლინარული ჯგუფის მიერ დადგენილი რისკიც გასაჩივრებადია პირის და მისი დამცველის მიერ,“–განაცხადა კახი კახიშვილმა.
მანანა ღოღობერიძე
