„მიხეილ სააკაშვილმა პარტიის წევრებს უწოდა მოღალატეები. ეს უკვე მორალური ზღვარიც აღარ არის. როდესაც პარტიის ლიდერი თანამებრძოლებს უწოდებს მოღალატეებს, აქ რა თქმა უნდა ჩნდება უფსკრული და მისი შევსება რთულია“. „ერთიან ნაციონალურ მოძრაობაში“ მიმდინარე პროცესებზე და მიხეილ სააკაშვილის განცხადებებზე პარტიის პოლიტსაბჭოს თავმჯდომარემ, საპარლამენტო უმცირესობის ლიდერმა დავით ბაქრაძემ „რუსთავი- 2“-ზე, გადაცემა „შაბათის კურიერის“ ეთერში ისაუბრა.
„ვიღაცას შეიძლება დავით ბაქრაძე უნდოდეს პარტიის თავმჯდომარედ, ვიღაცას დავით კირკიტაძე. არც ერთია მოღალატე, უბრალოდ ორივეს თავისი აზრი აქვს. როდესაც ლიდერების მონათვლა ხდება მოღალატეებად, ეს აჩენს ბზარს.
ნებისმიერი პოლიტიკური პარტიისთვის არჩევნები არის წყალგამყოფი, როდესაც ხდება შეფასება წარსული საქმიანობის და იმის, თუ რა უნდა გააკეთო მომავალში. მთელი რიგი პარტიებისთვის ეს არჩევნები აღმოჩნდა უბრალოდ დრამატული და ზოგისთვის ტრაგიკულიც. ბუნებრივია, რომ ამ არჩევნების შემდეგ „ნაციონალურ მოძრაობაშიც“ დადგა მომენტი, როდესაც უნდა გადავხედოთ წარსულს, რა გავაკეთეთ სწორად და რა არასწორად. უნდა გადავხედოთ მომავალს, როგორი პარტია უნდა ვიყოთ, რომ შევძლოთ საქართველოს წინსვლა და ივანიშვილის რეჟიმის დამარცხება. ეს არჩევნების მომენტი თავისთავად განაპირობებს შიდა პარტიულ დისკუსიას.
ნაციონალურმა მოძრაობამ მიხელ სააკაშვილთან ერთად შექმნა ქართული სახელმწიფო, მაგრამ ამასთან ერთად იყო შეცდომები და მძიმე დანაშაულებიც. ჩვენი სიძლიერე უნდა იყოს, რომ თვალი გავუსწოროთ წარსულს და მოსახლეობას ვაგრძნობინოთ, რომ გულწრფელად ვხდავთ შეცდომებს,“-განაცხადა დავით ბაქრაძემ.
მანანა ღოღობერიძე