,,თბილისი თაიმსი” საახალწლო ბაზრობებსა და მაღაზიებს ესტუმრა და დაითვალა, თუ რა შეიძლება დაჯდეს საახალწლო სუფრა. მაშ ასე, გთავაზობთ რამდენიმე აუცილებელი პროდუქტის ფასს:
თუკი გადაწყვიტეთ, ინდაურის საცივი გქონდეთ, მაშინ გეტყვით, რომ, საშუალოდ, მისი ყიდვა 50-დან 110 ლარამდე დაგიჯდებათ. ხოლო, თუ ამდენს ვერ გასწვდებით და ქათამს დასჯერდებით – ერთი კილოგრამს ფასი 6-დან 8ლარამდე მერყეობს.
ნიგვზის ფასი წლიდან წლამდე მზარდია – ბაზარში საშუალოდ 23 ლარად შეხვდებით, თუმცა, ხარისხიდან გამომდინარე, 22-დან 30-ლარამდეც მერყეობს.
ნივრის ფასი – 7-დან 10-ლარამდე მერყეობს, ბადრიჯნის – 3-ლარიდან 4-ლარამდე, ხოლო იმერული სახაჭაპურე ყველი 8-10 ლარი ღირს.
თუკი თავად გინდათ დააცხოთ ხაჭაპურები და სხვა ცომეული – ბაზრობებზეც და სუპერმარკეტებშიც საკმაოდ მისაღებ ფასად შეიძენთ ფქვილს -ერთ კილოგრამს – 80-თეთრიდან 1-ლარამდე. თუმცა, ზოგ სავაჭრო დაწესებულებაში 2-ლარამდეც შეხვდებით.
სულუგუნი 12-დან 15-ლარამდე მერყეობს. რაც შეეხება ხორცეულს – ერთი კილოგრამი ძროხისა და ღორის ხორცი თითქმის იდენტური ღირებულებისაა და 15-ლარამდე დაგიჯდებათ. თუმცა, გააჩნია, რა კატეგორიის ხორცის კერძს ამზადებთ – თუ მწვადი გსურთ გქონდეთ ახალ წელს, ფასი შედარებით მეტია და 17-დან 20-ლარამდეც კი შეიძლება დაგეხარჯოთ.
გოჭის ხორცით სიამოვნებაც 80 ლარზე ნაკლებად არ დაგიჯდებათ და შეიძლება ერთ ასეულ ლარსაც კი გადააჭარბოს, გააჩნია ზომასა და სისქეს.
1 კილოგრამი თაფლი 25-ლარამდე ღირს, თუმცა, ბაზრებში, დიდი ძებნის შემდეგ, 20 ლარადაც შეიძლება შეხვდეთ. თქვენს საახალწლო სუფრას ჩურჩხელაც დაამშვენებს – 1,5 ლარიდან 3-ლარამდე დაგიჯდებათ ეს სიამოვნება.
რაც შეეხება სასმელს – ოჯახის ღვინო 2,5 ლარიდან 5-ლარამდე დაგიჯდებათ, ხოლო არაყი – 3,5-ლარიდან 4,5-ლარამდე.
ბანანის ფასმა საგრძნობლად მოიმატა და 1 კილოგრამი 4-ლარიდან 5-ლარამდე ღირს, ფორთოხალი 1,5-ლარიდან 2-ლარამდე, ხოლო მანდარინი – 1-ლარიდან 1,5-ლარამდე.
ნატალია ჯალაღონია
