„ზოგი ჩავიდა და ყვება, რომ ამ მოგზაურობაში საშინელებები მოისმინა და ნახა, ზოგი ცდილობს, რომ მატარებელი რელსებიდან გადაიყვანოს. თუმცა ეს მატარებელი სულ აგრძელებდა სიარულს, სანამ 2012 წელს არ გაგვაჩერეს“. ამის შესახებ საქართველოს მესამე პრეზიდენტმა, „ერთიანი ნაციონალური მოძრაობის“ თავმჯდომარემ მიხეილ სააკაშვილმა „რუსთავი 2“–ზე, გადაცემა „არჩევანის“ ეთერში ისაუბრა.
„როდესაც პრეზიდენტი გავხდი, ეს ყველაფერი მატარებელს შევადარე და ყველა დავპატიჟე სამოგზაუროდ, რომ წავსულიყავით წინ. საქართველოს ამ შემადგენლობამ გაიარა დიდი გზა სწრაფი ტემპით. მგზავრები ამოვიდნენ, ბევრი პირველ ვაგონებშიც. შემდეგ პირველი ვაგონიდან ხალხი ჩავიდა, ზოგი მშვიდად, ზოგი ფურთხებით.
ბოლო არჩევნებით საქართველოში არჩევნების ინსტიტუტი ფაქტობრივად გაუქმდა. ივანიშვილმა საშინელი მანიპულაციებით, მასობრივი გაყალბებებით, 136 ათასი გაუქმებული ბიულეტენით მოახერხა გამარჯვება. სტატისტიკურად შუძლებელია, რომ „ნაციონალურ მოძრაობას“ წაეგო არჩევნები. მაგალითად ყველამ იცის, რომ სანდრას არ წაუგია არჩევნები.
რაც შეეხება გიგის, ადამიანურად ძალიან მიხარია, რომ ის გარეთ არის. ახალგაზრდა ადამიანი რამდენიმე წლით გაამწესეს საპატიმროში მხოლოდ იმისათვის, რომ რაც შეეძლო თავისი უნარების ფარგლებში მე მეხმარებოდა თბილისის განითარებაში. უკიდეურეს უსამართლობად მიმაჩნია, რომ ძირითადად ჩემ გამო დასაჯეს. ივანიშვილის მთავარი პრობლემა მე ვარ,“–განაცხადა მიხეილ სააკაშვილმა.
მანანა ღოღობერიძე