ლარიზაციის პროგრამის დეტალებზე საქართველოს ეროვნული ბანკის ვიცე-პრეზიდენტმა არჩილ მესტვირიშვილმა „რუსთავი 2“-ზე, გადაცემა „კურიერის“ ეთერში ისაუბრა.
„ეს პროგრამა არ არის ლარის კურსის დასტაბილურებაზე მიმართული ღონისძიება. პროგრამის მიზანია, რომ ფიზიკურ პირებს მოუხსნან გაცვლითი კურსის რისკი. სესხის გალარება შეღავათიანი კურსით მოხდება. მიმდინარე კურსს 20 თეთრი გამოაკლდება და სხვაობას მთავრობა აანაზღაურებს. კომერციული ბანკები სესხების გალარებისთვის მზად არიან. შეღავათი 2 თვის განმავლობაში გრძელდება.
პროგრამა გაგრძელდება ორი თვის განმავლობაში და ნებისმიერ პირს ექნება უფლება მიაკითხოს კომერციულ ბანკს, სესხის გალარების მიზნით. ჯერჯერობით სტატისტიკაზე საუბარი ნაადრევია, თუმცა კომერციული ბანკებიდან გვაქვს ინფორმაცია, რომ არის ინტერესი და მოქალაქეები არკვევენ პირობებს. 5 დღის შემდეგ კომერციული ბანკები ვალდებულები არიან შეტყობინების სახით აცნობონ პოტენციურ კლიენტებს, რომელთაც პროგრამა ეხებათ. ამის შემდეგ სავარაუდოდ მიმართვიანობა მეტად გაიზრდება.
პროცენტი იქნება საბაზრო, მომხმარებელს უნდა ჰქონდეს იმედი, რომ მიიღებს იმავე პროცენტს, რაც არის დღეს ეროვნული ვალუტით გაცემულ სესხებზე. ეს დამოკიდებული იქნება კონკრეტულ ბანკზე და კონკრეტულ მსესხებელზე. განაკვეთი დაახლოებით 10 % უნდა იყოს გალარებულ სესხებზეც.
პროექტის ფარგლებში ფიზიკურ პირს აქვს შესაძლებლობა, მიაკითხოს რამდენიმე კომერციულ ბანკს და თავისი სესხის გალარება მოახდინოს იმ კომერციულ ბანკში, რომელიც უკეთეს პირობებს შესთავაზებს. ბუნებრივია, კონკურენციის გამო მოლოდინია, რომ საპროცენტო განაკვეთები იქნება საბზროსთან ახლოს,“-განაცხადა არჩილ მესტვირიშვილმა.
მანანა ღოღობერიძე
