„მე დარწმუნებული ვარ,რომ ვანო მერაბიშვილი მოიქცევა აბსოლიტურად განსხვავებულად, ვიდრე მოიქცა გიგი უგულავა. ის არ გამოსულა ციხიდან, როგორც „ნაციონალური მოძრაობის“ წევრი. პირადად მჯერა, რომ მერაბიშვილი აბსოლიტურად სხვა სიმაღლეზე დგას“. ამის შესახებ „ერთიანი ნაციონალური მოძრაობის“ პოლიტსაბჭოს თავმჯდომარემ, ნიკა მელიამ, „რუსთავი 2“–ზე, გადაცემა „კურიერის“ეთერში ისაუბრა.
„არანაირი გადაწყვეტილება არ მიგვიღია. ეს ყრილობის დღის წესრიგში არც იყო შეტანილი. ეს არავის უნდა გაკვირვებოდა. ვანო მერაბიშვილი ბიძინა ივანიშვილის პოლიტიკური პატიმარია და ყველამ კარგად იცის, რა დამოკიდებულება აქვს „ერთიან ნაციონალურ მოძრაობას“ პოლიტიკურ დევნილებთან. არ ვაპირებთ ამ საკითხის განხილვას ვანო მერაბიშვილის ნების საწინააღმდეგოდ. მასზე იქნება დამოკიდებული რა გადაწყვეტილებას მიიღებს. მომდევნო კვირას ვაპირებ მასთან შეხვედრას სასჯელაღსრულების დაწესებულებაში. ეს არ იქნება კომფორტული, თუმცა ვეცდებით შედეგიანად ვისაუბროთ. პარტიას აინტერესებს მისი ხედვა და პოზიცია. მე მხოლოდ მოხარული ვიქნები, თუ ის დარჩება გენერალური მდივნის თანამდებობაზე.
პარტიის გარშემო ხელოვნურად წარმოშობილი დისკუსია იყო, სვამდნენ კითხვას, პარტია დაიშალა თუ გაიყო. არანაირი დაპირისპირება აღარ არსებობს. ერთი ჯგუფი წავიდა პარტიიდან. ეს არის წარსული. მათ ნაწილს წარმატებას ვუსურვებ.
სააკაშვილს არ აქვს საშუალება, რომ ყოველდღიურად ერეოდეს პარტიის საქმიანობაში. ბუნებრივია, ის არ ერევა სტრუქტურის ჩამოყალიბებაში. ყოველდღიური საკითხები გადაწყდება პოლიტიკური საბჭოს ფარგლებში. მე მასთან მაქვს კომუნიკაცია მნიშვნელოვან საკითხებზე. ეს მოცემულობაა, სააკაშვილი არის მოძრაობის ლიდერი, მაგრამ ყოველდღიურ საქმიანობაში ჩართული ვერ იქნება.
მანანა ღოღობერიძე
