მოსწავლე-ახალგაზრდობის სასახლეში რელიგიის საკითხთა სახელმწიფო სააგენტომ ადამიანის უფლებათა სამოქმედო სამთავრობო გეგმის ფარგლებში 2016 წელს განხორციელებული პროექტები და წიგნები წარადგინა, რომლებიც ამ პროექტების ფარგლებში გამოიცა:
- გაეროს, ევროსაბჭოს, ვენეციის კომისიისა და ოსლოს კოალიციის დოკუმენტები რელიგიის თავისუფლების შესახებ;
- რუმინეთის, ბულგარეთის, ავსტრიის, ლატვიის, ლიტვის, ესტონეთის, მოლდავეთის, სომხეთის, აზერბაიჯანის, რუსეთისა და ბელორუსიის კანონმდებლობა რელიგიისა და რწმენის თავისუფლების შესახებ;
- სეკულარიზმი და რელიგიური ნეიტრალიტეტი საჯარო სამსახურში (სახელმძღვანელო საჯარო მოხელეებისათვის);
- კონფერენციის – „ინტერრელიგიური დიალოგი მშვიდობისათვის“ – მასალები;
სააგენტოს თავმჯდომარემ – ზაზა ვაშაყმაძემ დაწვრილებით ისაუბრა 2016 წელს განხორციელებული პროექტების საჭიროებაზე. ითქვა, რომ ჩვენი ქვეყნისთვის მნიშვნელოვანია რელიგიისა და რწმენის თავისუფლებისა და ამ საკითხებში სამართლებრივი რეგულირების შესახებ საერთაშორისო ორგანიზაციების გადაწყვეტილებებისა და სხვადასხვა ქვეყნის კანონმდებლობის გაცნობა. ასევე აუცილებელია მათი გამოცდილების გაზიარება და შესაბამისად, ამ სფეროში თანმიმდევრული სახელმწიფო პოლიტიკის ჩამოყალიბება. ვაშაყმაძემ აღინიშნა ისიც, რომ დღეს, როცა სამყარო დგას ახალი გამოწვევების წინაშე და პასუხი ამ გამოწვევებზე მხოლოდ საერთო ძალისხმევითაა შესაძლებელი, მსგავსი პროექტების, წიგნების გამოცემა უდავოდ ხელს შეუწყობს რელიგიისა და რწმენის თავისუფლების საკითხებში საზოგადოების ფართო ფენების ინფორმირებულობას.
ღონისძიებას ესწრებოდნენ ქვეყანში მოქმედი ყველა რელიგიის წარმომადგენელი, უნივერსიტეტების პროფესორები, სხვადასხვა ქვეყნის ელჩები, მთავრობისა და პარლამენტის წევრები.
„ჩვენ, ადამიანებს, ყველაფერი შეგვიძლია, თვით შეუძლებელიც კი, მაგრამ მხოლოდ იმ შემთხვევაში, თუ სამყაროში არსებულ წინააღმდეგობებს, მიმდინარე პროცესებს ერთი განსაკუთრებული პრინციპით – სულიერების პრინციპით – მივუდგებით. ამ საქმეში კი უდიდესი როლი სწორედ რელიგიურ ლიდერებს, სასულიერო პირებს მიუძღვით,“– აღნიშნა საქართველოს პარლამენტის თავმჯდომარის მოადგილემ, გიორგი ვოლსკიმ.
გამომსვლელებმა ხაზი გაუსვეს ამ სახის და თავისი მნიშვნელობით ასეთი მაშტაბური პროექტების საჭიროებას.
„ერთობლივი ძალისხმევით მსგავს პროექტებზე მუშაობა და მათი დღის სინათლეზე გამოტანა, უდავოდ წაადგება, როგორც ამ საკითხებით დაინტერესებულ მოქალაქეებს, ინსტიტუციებს, ის ასევე აწევს ჩვენი ქვეყნის იმიჯს მეგობრების თვალში,“-აღნიშნა საქართველოს საკონსტიტუციო კომისიის წევრმა, ანა ფირცხალაშვილმა.
ავსტრიის საგანგებო და სრულუფლებიანმა ელჩმა საქართველოში, არანდ ბენკომ ხაზი გაუსვა, რომ აუცილებელია ამ სფეროში კანონმდებლობით განსაზღვრული უფლებების დაცვა. დაწვრილებით ისაუბრა მის ქვეყანაში მუსლიმთა მდგომარეობას და ავსტრიის კანონმდებლობით მკაცრად განსაზღვრულ მათ უფლებებს.
საქართველოს მართლმადიდებელი ეკლესიის მღვდელმსახური, არქიმანდრიტი – ადამ ახალაძე ინტერრელიგიური დიალოგის მნიშვნელობაზე ისაუბრა და აღნიშნა, რომ ასეთი დიალოგი შესაძლებელია მხოლოდ იმ შემთხვევაში, თუ შეიქმნება ერთიანი, ყველასათვის მისაღები ფუნდამენტი, რომელიც მოიცავს უნივერსალურ, ზოგადსაკაცობრიო მარადიულ ღირებულებებს, როგორც გზას თანხმობისა და ურთიერთგაგებისკენ. „წარმოდგენილი პროექტები ატარებს არამხოლოდ შიდა მოხმარების სტატუსს, არამედ ის ასევე საერთაშორისო მნიშვნელობისაა, “-აღნიშნა არქიმანდრიტმა ადამმ.
გამომსვლელებმა მადლობა გადაუხადა სააგენტოს და მის თავმჯდომარეს გაწეული საქმიანობისათვის.
სოფიკო ნინიკაშვილი
