„ხელშეკრულებაში ფორსმაჟორული მდგომარეობა მითითებულია, ანაზღაურება არ გვევალება, თუმცა დაზარალებულები ჩემთვის მხოლოდ მოვაჭრეები არ არიან. ბევრი მათგანი ჩემი მეგობარია და რაც ჩემზე იქნება დამოკიდებული, მაქსიმალურად დავეხმარები“.ამის შესახებ სავაჭრო ცენტრ „ბავშვთა სამყაროს“ აღმასრულებელმა დირექტორმა, გიორგი მაჭავარიანმა, „ტვ პირველზე“, გადაცემა „დიანა ტრაპაიძის დღის ამბების“ ეთერში ისაუბრა.
„შენობა დაზღვეული იყო, რაც შეეხება მოიჯარეებს, მათ უმრავლესობას ქონება დაზღვეული არ ჰქონდა.მადლობა მეხანძრე–მაშველებს, თუმცა შედეგი ვერ მივიღეთ. მასშტაბური ხანძარი იყო, მისი ლოკალიზება დროულად მაინც ვერ მოხდა. ისინი რამდენიმე წუთში მოვიდნენ ადგილზე, თუმცა ცეცხლი შენობას სწრაფად მოედო.
ხანძრის ხელოვნურად გაჩენის შესახებ ეჭვი, მოვაჭრეებისგან არ წამოსულა. არ მინდა, რომ ეს ტრაგედია პოლიტიკურ ჭრილში გადავიდეს. არ მინდა, რომ „ბავშვთა სამყაროს“ პრობლემა პირადი მიზნებისთვის გამოიყენონ.
გვქონდა შეხვედრა დედაქალაქის მერიის წარმომადგენლებთანაც. გადავწყვიტეთ,რომ შევქმნათ სამუშაო ჯგუფები და ერთად აღვწეროთ ხანძრის შედეგად მიყენებული ზარალი. მერიას დაზარალებულების დასახმარებლად გარანტიები არ მოუცია და არც არის ვალდებული. ჩვენ, როგორც სააქციო საზოგადოება, გვაქვს პასუხისმგებლობა და შეძლებისდაგვარად შევძლებთ მათ დახმარებას,“–განაცხადა მაჭავარიანმა.
მანანა ღოღობერიძე
