„ეს არის მოკლევადიანი ვიზიტების მიზნით და არ გულისხმობს დასაქმების უფლებას ან სხვა გრძელვადიანი დარჩენის მიზანს. კარგად უნდა დაასაბუთონ სად მიდიან, ვისთან, რა მიზნით და როდის ბრუნდებიან“. ევროპის ქვეყნებში უვიზო მიმოსვლის შესაძლებლობის უპირატესობაზე და შეჩერების მექანიზმის ამოქმედების რისკებზე, საგარეო საქმეთა მინისტრმა, მიხეილ ჯანელიძემ, ტელეკომპანია „იმედზე“, გადაცემა „ქრონიკის“ ეთერში ისაუბრა.
„მინდა მივულოცო ჩვენს მოსახლეობას დღევანდელი გადაწყვეტილება. ეს პირველ რიგში ხაზს უსვამს ევროპული პოლიტიკური სპექტრის მხარდაჭერას საქართველოს ევროინტეგრაციის გზაზე. ევროკავშირის პარლამენტში ამ გადაწყვეტილებით პროცესი დასრულდა. მხარდაჭერა წევრთა 86 %-მა გამოხატა. ეს არის იმის წინაპირობა, რომ დანარჩენი ტექნიკური გადაწყვეტილებებიც ასევე წარმატებით დასრულდება და საქართველოს მოქალაქეებს შეეძლებათ მოკლევადიანი ვიზიტით ესტუმრონ ევროკავშირის წევრ ქვეყნებს.
ამის შემდეგ ევროპარლამენტის და ევროსაბჭოს მხრიდან ხელი მოეწერება საკანონმდებლო ცვლილებას და შემდეგ გამოქვეყნდება. გამოქვეყნებიდან 20 დღეში კანონი ძალაში შევა. ზუსტ თარიღს ვერ დავასახელებ, დარწმუნებული ვარ, რომ არსებობს სრული მხარდაჭერა, საკითხის მალე განსახილველად. ამის პოლიტიკურ მზაობას ვხედავთ და ვისმენთ შესაბამისი განცხადებებით, ევროპული სტრუქტურების მხრიდან. ველოდებით რომ პროცესი შეუფერხებლად წარიმართება.
დიდი მნიშვნელობა აქვს ჩვენი ქვეყნის და მოქალაქეების მხრიდან, ყველა პროცედურის დაცვას. პირველ რიგში მოქალაქეებმა კარგად უნდა გაიგონ ის პროცედურები, რაც საჭიროა უვიზო მიმოსვლისთვის. შეჩერების მექანიზმი ამოქმედდება, თუ გაიზრდება კრიმინალური შემთხვევები,ან დიდი იქნება თავშესაფრის მაძიებელთა რაოდენობა,“-განაცხადა მიხეილ ჯანელიძემ.
მანანა ღოღობერიძე
