ჯანდაცვის სამინისტრომ 2017 წლიდან ფსიქიკური ჯანმრთელობის დაფინანსების წესი შეცვალა. ამ ცვლილებამ ზოგადი პროფილის საავადმყოფოებში მოქმედი ფსიქიატრიული განყოფილებების დახურვა გამოიწვია.
ღუდუშაურის კლინიკამ განცხადება გაავრცელა, სადაც ნათქვამია, რომ შემცირებული ბიუჯეტის გამო, ღუდუშაურის სახელობის კლინიკის ფსიქიატრიული განყოფილება პაციენტების მიღებას წყვეტს.
„საქართველოს მთავრობის 2016 წლის 30 დეკემბრის N 638 დადგენილების შესაბამისად ფსიქიური ჯანმრთელობის სახელმწიფო პროგრამის მიხედვით შესრულებული სამუშაოს დაფინანსების წესში შეტანილია ცვლილებები. ცვლილების მიხედვით გათვალისწინებულია პროგრამული სახსრების ეფექტურობის ზრდა, როგორც მწვავე ასევე ქრონიკული მდგომარეობების მიმართულებით. სამწუხაროდ, ასეთი მოცულობის ფსიქიატრიული სტაციონარული ქვედანაყოფის მოწყობა ამ ეტაპზე ღუდუშაურის ცენტრში შეუძლებელია. ერთის მხრივ, ვაცნობიერებთ, რომ სახელმწიფო პროგრამის სახსრები ვერ იქნება მიმართული ცალკეული კლინიკის ინტერესის მიხედვით; მეორეს მხრივ, ვითვალისწინებთ იმ გარემოებას, რომ ფსიქიატრიული დახმარების სტაციონარულ ქსელში არსებობს საკმარისი სიმძლავრე პაციენტებისათვის საჭირო მკურნალობის შეუფერხებელი ჩატარებისათვის და პაციენტებს არ შეექმნებათ სერვისის მიღების პრობლემა. ღუდუშაურის ცენტრი 2017 წლის ფსიქიკური ჯანმრთელობის სახელმწიფო პროგრამის სტაციონარული დახმარების კომპონენტით განსაზღვრულ მომსახურებას აღარ მიაწვდის. ცენტრის ადმინისტრაცია მუშაობს იმ საკითხზე, თუ როგორ უნდა განვითარდეს არსებული განყოფილების ბაზაზე სახელმწიფო პროგრამის გარეთ დარჩენილი სერვისების მიწოდებისათვის საჭირო სიმძლავრეები“ – ღუდუშაურის ეროვნული სამედიცინო ცენტრის განცხადება
რატომ შემცირდა ფსიქიური ჯანმრთელობის სახელმწიფო პროგრამის ბიუჯეტი და როგორ განისაზღვრა დაფინანსების წესი, ამ და სხვა აქტუალური კითხვებით „თბილისი თაიმსმა“ ჯანდაცვის სამინისტროს მიმართა.
სულ რამდენი ფსიქიატრიული განყოფილებაა საქართველოში? აქედან რამდენია ზოგადი პროფილის საავადმყოფოებში გახსნილი?
– „ფსიქიკური ჯანმრთელობის“ სახელმწიფო პროგრამის ფსიქიატრიული სტაციონარული მომსახურების მიმწოდებლია 12 სამედიცინო დაწესებულება, მათ შორის 3 განყოფილება ფუნქციონირებდა ზოგადი პროფილის საავადმყოფოებში.
სტატისტიკა როგორია, ბოლო მონაცემით რამდენი ადამიანი სარგებლობს სტაციონალური მომსახურებით?
– 2016 წლის 9 თვის მონაცემებით ბავშვთა და მოზრდილთა ფსიქიატრიული სტაციონარული მომსახურების ფარგლებში მომსახურება გაეწია 4.4 ათასზე მეტ ბენეფიციარს.
როგორც გავრცელდა ინფორმაცია, ღუდუშაურის კლინიკაში არსებულმა ფსიქიატრიულმა განყოფილებამ შეწყვიტა მომსახურება და ბენეფიციარების მიღება, მიზეზი ფინანსების არ ქონაა და ბიუჯეტის შემცირება სახელდება. რა ბედი ეწევათ იმ ბენეფიციარებს, ვინც კლინიკებში მკურნალობენ?
– აღსანიშნავია, რომ 2017 წლის ფსიქიკური ჯანმრთელობის სტაციონარული მომსახურების ბიუჯეტი დაითვალა და გადანაწილდა სამართლიანად. შეიცვალა დაფინანსების მექანიზმი როგორც მწვავე, ასევე ქრონიკული შემთხვევებისთვის. თუ რომელიმე კლინიკას არ აინტერესებს ასეთ პირობებში მომსახურების მიწოდების გაგრძელება, ეს მისი უფლებაა. ბენეფიციარებს შესაძლებლობა ექნებათ კვლიფიციური და მაღალხარისხიან ფსიქიატრიული მომსახურება მიიღონ სხვა მიმწოდებელ დაწესებულებებში.
რატომ შემცირდა ბიუჯეტი? რა ცვლილებებია ახალ დადგენილებაში? როგორ განისაზღვრა დაფინანსების წესი?
– წლის პროგრამის ბიუჯეტი 2016 წლის დამტკიცებულ ბიუჯეტთან შედარებით გაიზარდა 1 მილიონი ლარით, თუმცა 2016 წლის ბოლოს პროგრამის ფარგლებში დაფიქსირდა 1 500 000 ლარის დეფიციტი. 2017 წლის ბიუჯეტის ფარგლებში იგივე დეფიციტის თავიდან არიდების მიზნით, წინასწარი ანალიზის შედეგად განხორციელდა დაფინანსების მექანიზმის ცვლილება. გადაიხედა ყველა კლინიკის ფაქტობრივი ხარჯი და მწვავე შემთხვევების ვაუჩერის ღირებულება ამის მიხედვით განისაზღვრა. პარალელურად, გაიზარდა დაფინანსება ქრონიკული შემთხვევებისთვის.
ნინი მაზიაშვილი
