საქართველოს საკონსტიტუციო სასამართლომ არსებითად განსახილველად მიიღო “სსიპ „საქართველოს ევანგელურ–ბაპტისტური ეკლესიის“, სსიპ „საქართველოს ევანგელურ–ლუთერული ეკლესიის“, სსიპ „სრულიად საქართველოს მუსლიმთა უმაღლესი სასულიერო სამმართველოს“, სსიპ „დახსნილ ქრისტიანთა საღვთო ეკლესიის საქართველოში“ და სსიპ „საქართველოს სახარების რწმენის ეკლესიის“ კონსტიტუციური სარჩელი N811 საქართველოს პარლამენტის წინააღმდეგ.
რელიგიური ორგანიზაციები ასაჩივრებენ საქართველოს მთავრობის გადაწყვეტილების საფუძველზე სახელმწიფო ქონების უსასყიდლოდ გადაცემის შესაძლებლობას მართლმადიდებელი ეკლესიისთვის, ვინაიდან ნორმას დისკრიმინაციულად მიიჩნევენ, რადგან ამის შესაძლებლობა მხოლოდ მართლმადიდებელი ეკლესიისთვის არსებობს.
სარჩელის თანახმად, მოსარჩელეები ითხოვდნენ “სახელმწიფო ქონების შესახებ” იმ დებულებათა არაკონსტიტუციურად ცნობას, რომლებიც საქართველოს კონსტიტუციით გარანტირებულ საკუთრებისა და თანასწორობის უფლებას ეწინააღმდეგება.
რელიგიური დენომინაციების ინტერესებს ტოლერანტობისა და მრავალფეროვნების ინსტიტუტი (TDI) და თბილისის თავისუფალი უნივერსიტეტი წარმოადგენენ. სარჩელიც სწორედ მათ შორის გაფორმებული მემორანდუმის ფარგლებშია მომზადებული.
საკონსტიტუციო სასამართლომ 5 რელიგიური დენომინაციის სარჩელი გასახილველად ნაწილობრივ მიიღო:
„კერძოდ, სარჩელი შეეხებოდა “სახელმწიფო ქონების შესახებ” საქართველოს კანონის მე-3 მუხლის პირველი, მე-2, მე-5 პუნქტის იმ სიტყვების კონსტიტუციურობას, რომლის თანახმადაც, საჯარო სამართლის იურიდიული პირის სახით რეგისტრირებული რელიგიურ გაერთიანებები (გარდა საქართველოს სამოციქულო ავტოკეფალური მართლმადიდებელი ეკლესიისა) მოკლებულნი არიან შესაძლებლობას, შეიძინონ სახელმწიფო ქონება. ასევე, გასაჩივრებულია ამავე კანონის მე-63 მუხლის პირველი პუნქტი, რომელიც ითვალისწინებს სახელმწიფო ქონების უსასყიდლოდ გადაცემის შესაძლებლობას მხოლოდ საქართველოს მართლმადიდებელი ეკლესიისთვის.
სარჩელის თანახმად, ზემოთ აღნიშნული ნორმები რელიგიურ ორგანიზაციებს, გარდა საქართველოს სამოციქულო ავტოკეფალური მართლმადიდებელი ეკლესიისა, უქმნის არამართლზომიერ დაბრკოლებებს, აყენებს მათ უთანასწორო მდგომარეობაში და ხელყოფს მათ კონსტიტუციურ უფლებებს.
საკონსტიტუციო სასამართლომ, არსებითად განსახილველად მიიღო სარჩელის მხოლოდ ის ნაწილი, რომელიც შეეხება “სახელმწიფო ქონების შესახებ” საქართველოს კანონის 63 მუხლის პირველი პუნქტის სიტყვების “საქართველოს სამოციქულო ავტოკეფალურ მართლმადიდებელ” კონსტიტუციურობას საქართველოს კონსტიტუციის მე-14 მუხლთან მიმართებით. ამჟამინდელი მდგომარეობით, აღნიშნული ნორმის საფუძველზე, სახელმწიფო ქონება, ანაზღაურების გარეშე, მხოლოდ საქართველოს საპატრიარქოს გადაეცემა,“– აღნიშნულია ტოლერანტობისა და მრავალფეროვნების ინსტიტუტის (TDI) განცხადებაში.
საქმეს განიხილავს საქართველოს საკონსტიტუციო სასამართლოს პირველი კოლეგია.
რელიგიური ორგანიზაციების კონსტიტუციური სარჩელი N811 სრულად შეგიძლიათ იხილოთ: constcourt.ge/ge/court/sarchelebi
სოფიკო ნინიკაშვილი
